apm人龍店 歎正宗 越南粉 @Dining娜
Photo：二彤
上年去越南旅行，朋友推介我去胡志明市老字號錦麗食 越南粉 ，試過佢哋嘅招牌牛肉粉同越南咖啡後就一直念念不忘。半年前，錦麗第一間海外分店進駐咗觀塘apm，上星期終於有時間去試下，比起越南本店，香港店多咗幾款小食，最近亦加推埋凍越南咖啡，不過大家要預咗可能會排長龍。
錦麗牛肉粉被譽為越南胡志明巿最好食嘅牛肉粉，最高紀錄日賣3,000碗，佢哋嘅牛粉出名湯底清甜，香港店開業前，大廚特登飛到越南拜師學藝，湯底同牛粉煮法都跟足越南錦麗，味道夠晒正宗。香港店嘅設計簡約清新，以摩登越式風情為主題，加上傳統越式布置做點綴，充分展現出時尚與傳統之間嘅平衡。
香港店獨有小食
越南錦麗總店真係專食牛粉，而香港店就多咗牛油雞翼、米紙卷、蝦餅同小米糕4款小食，飲品選擇亦比較多。值得一提係湯底堅持每日用牛骨、牛坑腩、 八角、桂皮等慢火熬製，鮮甜得嚟帶有香濃牛肉味！除咗綜合粉外，仲有熟牛肉粉、生牛肉粉、生熟牛肉粉同牛丸粉共5款選擇，為食嘅我當然係叫綜合粉，可以試齊全部配料。
錦麗綜合粉 $58
一碗有齊生牛肉、熟牛肉同爽口彈牙嘅牛丸，大家可以按喜好將鵝蒂、九層塔、怡寶芽菜撕碎加入牛粉一齊食，亦可以加入辣椒同青檸。想食得再地道啲就是將拉差辣醬同甜醬倒入碟仔，蘸牛肉食，別有一番風味。
小米糕（4件）$32
坊間越式餐廳比較少見嘅小食，外形似足砵仔糕，蒸熟嘅米糕加上花生、肉鬆、葱油，仲有錦麗自家調製嘅魚露，味道酸酸甜甜，十分惹味。
法式牛油蒜蓉雞翼（4件）$34
採用法國牛油烹煮，所以特別香滑，一上枱就聞到好大陣蒜香味，外層香脆，食落非常juicy。
大蝦扎肉米紙卷（2件）$28
煙靱嘅米紙包住蝦、扎肉、檬粉、金不換、青瓜等，口感清新，配埋自家製魚露醬汁，每啖都有甜酸鮮味，相當開胃。
炸手作蝦餅（2件）$38
蝦膠每日人手打成 ，鮮嫩爽口，而且件件都好飽滿多汁，不過要注意數量有限，賣完就冇，想食記得唔好太晏過去。
凍越式滴漏咖啡 $28
越南咖啡出名在濃郁醇厚，略帶苦澀回甘，等咖啡慢慢滴漏到裝有煉奶嘅杯中，攪勻撞入冰杯就變成涼透心嘅冰凍越南咖啡，夏天飲啱晒。
