真心推！氹仔人都讚的非葡菜餐廳 @Dining娜

Feb 3 2017

發覺依家好多人過大海都鍾意去氹仔嗰頭食嘢，但食肆選擇實在太多，令人花多眼亂，唔少朋友出發前都會問我有冇心水推介，見詢問度咁高，我決定直接出post公開幾間私心推介嘅餐廳俾大家。放心，絕對唔會係大家已經聽過、食過無數次嘅推介，呢啲唔使我講上網search就搵到大把食評，今次反而想推薦幾間高質得嚟又有新意嘅餐廳，去澳門前必須熟讀！

（Presented by Unionpay）
相信大家都知澳門唔只建築帶有濃厚西方色彩，連飲食都深受歐洲影響，除咗為人熟悉嘅葡國菜，西班牙、意大利等歐陸風味菜同樣值得一試！

塔巴斯西班牙小館

西班牙係葡萄牙鄰居，菜式方面既有相似之處，亦有雙牙各自嘅特色，今次想介紹2間我呢期去親澳門都必食嘅西班牙餐廳。先嚟3層高嘅塔巴斯西班牙小館，塔巴斯明顯係Tapas諧音，餐廳希望提供一個舒適自在嘅環境俾食客一邊傾偈飲酒、一邊享用小食，所以裝潢上都比較活潑跳脫，偏橙紅tone天花牆身加上色彩艷麗嘅掛畫瓷磚，令人一下子就投入咗西班牙式熱鬧氣氛。除室內位置，餐廳3樓仲有個露台，喺度可以飽覽氹仔區景色，日夜一樣咁好feel。至於菜式方面，主打嘅一口Tapas當然冇得輸，但餐廳另外都有供應熱盤，全部都好足料，建議幾個朋友一齊share就可以一次試多幾款。

地址：氹仔舊城區木鐸街9號地舖
電話：853- 2857 6626
慳錢小貼士：以銀聯卡惠顧食品及飲品可享85折

唐吉柯德

如果話塔巴斯西班牙小館代表熱情奔放，咁唐吉柯德一定係沈實內斂。唐吉柯德設計特色係採用一室深啡色木，牆上都掛有好多同西班牙有關嘅畫，但色彩以monotone為主，整體感覺有種簡約古典美，好有西班牙小鎮啲家庭式菜館嘅風味。既然係賣溫馨，菜式當然係跟足地道手法烹調，各款傳統冷盤小菜、熱食小菜同經典西班牙海鮮飯（Paellas）都一應俱全，特別想讚一讚佢哋嘅貼心服務，有食過西班牙海鮮飯都知份量大到食得飽3-4個人，但呢度佢分咗2、3、4、6人份量，方便大家按人數或食量自行選擇，唔使做大嘥鬼，又唔怕食完個飯就食唔落其他嘢。

地址：氹仔舊城區巴波沙總督街30A-50號錦程閣地下D, E舖
電話：853-2882 5028
慳錢小貼士：以銀聯卡惠顧可獲贈Sangria或甜點（人頭計）

我的意大利廚房

跟住將焦點移過少少去到意大利，大家可能心諗咪又係意粉Pizza燴飯，咁就錯晒喇！邊個話意大利人只愛吸取大量澱粉質？如果你問當地人有咩係必食，其實牛肉、牛扒先係Top 1，尤其是Toscana地區，烤牛扒先係最具代表性嘅名菜。嚟到氹仔呢間我的意大利廚房就可以品嘗到風味正宗嘅烤牛扒喇，呢道菜最講究牛肉本身嘅鮮味同質感，因為燒烤過程唔會加太多調味，所以餐廳對各款肉類嘅品質要求都相當嚴謹，食咗咁多次從未失望，不過都知未必人人食牛，餐廳另有提供烤豬扒、烤豬肉，咁戒牛人士就一樣試到呢款地道佳餚喇。

地址：氹仔舊城區排角路6-12號泉福新村偉興閣地下AD-AF舖
電話：853-2882 7818
慳錢小貼士：以銀聯卡惠顧晚膳可享瓶裝酒85折

扒皇燒

無肉不歡者，接住要介紹嘅扒皇燒應該係你哋杯茶。一聽個名就知有啖啖肉食，的確，各款扒類菜式就係扒皇燒招牌菜，有豬扒、牛扒、三文魚扒、羊架任君選擇，仲要有唔同部位同味道可以揀，超大一份都只係平均百幾蚊有交易，好抵食！除咗扒餐，扒皇燒都有做沙律、漢堡包呢啲西餐食品，據聞佢哋漢堡扒全部係用新鮮肉製作，食落寧舍juicy，下次我都要試下先。

地址：氹仔舊城區地堡街47號泉福新村第2期第4座偉展閣W-X舖地下
電話：853-2882 7043
慳錢小貼士：以銀聯卡惠顧可享9折

金坂極上壽司 @新濠天地

人總有懶嘅時候，唔想行太遠多數選擇留喺酒店搵食，除咗自助餐，酒店入面其實都有好多優質食府可以揀。例如新濠天地嘅金坂極上壽司，雖然香港冇分店未必人人都識，但其實大有來頭，金坂係日本過江龍高級壽司餐廳，同東京總店一樣奪得米芝蓮星級榮譽，可想而知品質有幾Ichiban。澳門店同樣秉承總店嚴謹認真、一絲不苟嘅精神，食材經過精挑細選仲要產地直送，夠晒原汁原味，賣相亦係精緻到無可挑剔。晚餐有三個Set可以揀，我就每次必點$1,688嘅江戶前壽司Set，有齊握壽司、卷壽司、湯同生果，食材新鮮，一試難忘！

地址：路氹城連貫公路新濠天地皇冠度假酒店1樓
電話：853- 8868 7300
慳錢小貼士：以銀聯卡惠顧晚市套餐可享9折