今年 冬至 食乜餸? @DINING娜
所謂「冬大過年」，做冬梗要食得夠豐富，所以大魚大肉、煎炸炆燉在所難免，點先可以食得健康啲? 不如跟營養師學下點樣健康做冬。
住家菜都會鹽份超標
仲有唔夠一星期就到 冬至 ，唔少人都會選擇返屋企做節食飯，菜式應有盡有，好似冬菇蠔油炆五花腩、炆豬手、臘味糯米飯、黃金蝦咁都係冬常見冬至菜，係就係惹味，不過鈉含量都唔惹少……
資深營養師吳耀芬(Kathy)指出，吸收過量鈉唔只容易水腫，仲會增加腎臟負擔，最嚴重係會增加患高血壓風險，甚至引致中風。
講到咁恐怖，唔通以後煮餸真係最好1粒鹽都唔落，要清一色白烚清蒸咁灰？
冬至 住家飯，點食先健康？
又唔洗咁極端嘅，揀啱食材同調味料一樣可以食得好又食得健康。雖然香港對高鈉食物並冇特別定義，但根據世衞建議，每人每日唔應該攝取多於1茶匙鹽，即是約2000毫克鈉質。每日得1茶匙咁少，一唔小心真係好易中招，唔想貪一時口腹之慾換來一身病痛可以記住以下幾招！
一、少食醃製同加工食品，多選擇新鮮食材，例如用番茄取代茄醬，或者用香草、蒜頭做調味料，都有助減少鈉嘅吸收。
二、飲足夠嘅水排出多餘鈉質同廢物；海帶、紫菜、毛豆呢類高鉀質蔬菜可以降低體內鈉含量，多食無妨。
三、多醬汁嘅菜式通常鹽量較高，出街食飯時要盡量避免，可以嘅話主動要求「少鹽」、「少汁」、「走味精」。
四、煮餸時用成份天然嘅調味料，最好冇防腐劑同人造色素。依家坊間有唔少醬油都推出減鹽配方，食起嚟會比傳統醬油更健康。
材料：
仿鮑魚片8片、去皮雞脾肉115g、鮮冬菇（中型）4隻、鮮枝竹2條、灼熟菜芯6棵、灼軟韮菜8單條
雞肉醃料：
蠔油1茶匙、豉油1茶匙、胡椒粉少許、粟粉1/2茶匙、生油1茶匙
冬菇醃料：
蠔油1茶匙
芡汁：
蠔油1 1/2湯匙、豉油1茶匙、步驟4汁液加水共7湯匙、粟粉1茶匙
做法：
- 雞脾肉切成8片，加醃料拌勻。每條枝竹切成4段。
- 鮮冬菇用濕布抺淨，用油煎至軟身，盛起，切成8件，再加醃料拌勻。
- 鮑魚片、雞片、冬菇放上枝竹並捲起，用韮菜扎實，排放碟上
- 大火隔水蒸6分鐘，倒去碟中汁液留用。
- 把灼熟菜芯排放在枝竹扎旁邊，煮滾芡汁淋上即可。
資深營養師吳耀芬(Kathy)
Kathy是中大食物及營養科學學士、港大心理輔導學碩士、認可身心語言程式學（NLP）導師和催眠治療師，常出席電視報章營養專訪，及撰寫專欄文章。她以「身營心營」為信念，幫助城市人快樂修身。
