《臥底旅行團2.0》揭內地團活捉螢火蟲 過萬隻餐廳放飛遭踩死 網民鬧爆：好殘忍！
《臥底旅行團 2.0》窺探「漫天飛舞螢火蟲晚會」
由「阿正」李尚正同「妹頭」盧頌恩主持嘅《 臥底旅行團 2.0》，喺第12集就潛入「金光閃閃螢火蟲之夜」，呢個團一年只係舉辦兩團，除咗住溫泉度假村、去水上樂園、開平睇古蹟碉樓，重頭戲當然係螢火蟲大會，佢哋去一間餐廳品嘗養生餐後，安坐餐廳內睇螢火蟲。據導遊及餐廳職員表示，其實過往試過喺戶外進行放飛活動，但螢火蟲只能在溫度適宜嘅地方飛行，由於外邊天氣較熱不適合螢火蟲飛行，所以選擇喺餐廳放飛。當晚大家食完養生餐後就會開始放飛大會，阿正話據導遊講睇螢火蟲的時候手機要較暗，也唔可以亮起發光嘅物件，不然會影響螢火蟲飛行而跌落地下！
螢火蟲疑受驚未肯飛
團友們食飽飽後，餐廳就關掉全部燈，之後有幾位職員捧住大玻璃桶入餐廳，當掀開黑布後，就見到大量閃下閃下嘅螢火蟲喺桶內，好靚！不過未知螢火蟲是否受驚，起初好多都唔肯飛出來，又唔肯飛向天花板，一直停留在桶內。
見螢火蟲唔肯飛出嚟，工作人員索性拎起桶內嘅葉子揈啲螢火蟲出來，結果成地都係螢火蟲，一閃一閃咁！
跌入菜湯浸死
放飛期間，有團友未有理會螢火蟲要在黑暗環境下才能飛行的提示，開手電筒照亮會場。同時，有數隻螢火蟲跌落枱上的一盆枸杞湯內，起初仲閃閃發光，但不久就浸死了！
救救螢火蟲
之後又有兩隻飛撲停在妹頭身上及手臂上，阿正把牠捉到樽內，之後再捉了十多隻入樽內！
歷時約十分鐘的放飛晚會結束後，二人把樽內的螢火蟲拿到餐廳附近的草叢放生，妹頭話：「餐廳主持話會將活嘅螢火蟲放生，我哋依家返去餐廳睇下佢哋有冇講大話！」
遍地螢火蟲屍體
不過返到餐廳見職員忙於收拾枱面餐具，一望地板，就見滿布被踩死的螢火蟲，成地一粒粒黑色，好心痛呀！
睇真啲，原來螢火蟲身形長而扁，有啲似細曱甴！其實都仲有小部分是未死，不過未知職員執完枱仲會唔會捉佢哋放生。
「冇諗過喺餐廳放飛」
兩位主持及後總結呢晚活動，表示一直以為在山頭欣賞，又或者在好多螢火蟲聚居嘅地方睇，冇諗過捕捉逾萬隻螢火蟲喺餐廳放，阿正話由於下午一直落雨，起初還擔心受天氣影響而活動會取消，估唔到喺室內睇！
而主持妹頭就無奈咁話：「大家睇到啦，浪漫完一輪，現實就係咁（螢火蟲死晒）！」而節目尾聲係評分嘅時間，妹頭話因為覺得放飛嘅螢火蟲被踩死晒好殘忍，佢只係畀兩粒星！
網民：唔參加，好殘忍！
螢火蟲繁殖季節是4月中到5月，牠們愛生活在潮濕的地方如河流、稻田或森林等沒有光害的地方，在求偶時牠們的尾部就會閃閃發光，但由於人類對大自然的破壞，螢火蟲的棲息地減少以至繁殖的數目銳減。唔少網民睇完也都在妹頭的FB專頁留言，話捉大量螢火蟲入室內之後仲被踩死，做法相當殘忍，個團其他節目再好玩都唔會去，妹頭也表示認同。
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
