餐廳加價阿婆破口大罵：「40年前唔係咁嘅價！」 店員一句回應引來掌聲！｜網絡熱話
廣告
不論生活用品、車費定係食物都加價，然而面對住三十幾蚊一個快餐店薯條套餐，就會令人諗起十幾年前同一款餐只係$14-$16左右。不過回到過去實在有啲難度，唯有慢慢去接受。但係總有人接受唔到現在，就好似近日有餐廳員工投稿至「西客之道 Hispitality Secret」，分享一件因加價而發生的趣事。
撰文：Evita | 圖片：西客之道、新傳媒圖片庫、劇照
阿婆大鬧餐廳加價：「40年前唔係咁嘅價！」
日前有自稱喺餐廳打工嘅網民投稿至Facebook專頁，指餐廳已經有多年歷史，多數都係做熟客生意多。然而網民分享有一日有個阿婆買外賣，同事幫阿婆落單後，阿婆睇到張單就不斷鬧。
阿婆：「咁貴㗎，有無搞錯啊？好貴啊，貴過我之前食好多啊！」
同事：「婆婆，無辦法啦，有時成本貴得太多，公司都會調整吓價格。」
阿婆：「好貴，好貴啊，以前食唔係咁㗎！」
而同事就以「成本上升」為由，向阿婆解釋生意難做，話對上一次加價已經係成年之前，亦話只係加咗$2-$3。
阿婆一於唔理：「我由六十年代就開始食你哋，你識咩啊？我食咗40幾年㗎，你哋40幾年前唔係咁嘅價㗎！咩幾蚊啊？係貴咗好多啊！40年前你地好平㗎，你都未出世啊！」
網民表示該名同事決定唔理阿婆，但係阿婆繼續一路等外賣一路破口大罵，內容重覆又重覆，搞到全餐廳嘅人都望住佢。然而網民表示同事忍無可忍，最終走埋去同阿婆講：「阿婆，你揸住嗰層樓40年前夠唔係咁嘅價啦！你用40年前個價賣你層樓畀我，今餐我用40年前個價賣畀你囉！」
同事一句K.O. 阿婆，引得全場客人喺度笑，而網民就表示該名阿婆聽到呆晒就無再出聲。有其他網民搞笑留言：「阿婆無再出聲可能係有幾層揸手」、「你40幾年前都唔係咁嘅樣啦」，不過都有網民認為阿婆可能係記性衰退，應該加以原諒。
撰文：Evita | 圖片：FB@西客之道、新傳媒圖片庫、劇照
