海洋公園 歎米芝蓮餐廳總廚盛夏嚐味得獎菜 ＠Dining娜
7、8月熱辣辣，流汗流到成個人冇晒胃口，如果能夠置身於海底之中歎美食就爽喇！最近畀我Dining娜發現 海洋公園 嘅海龍王餐廳，推出咗一系列由米芝蓮餐廳總廚陳國強師傅設計嘅「夏日嚐味菜單」，不單以多款時令食材入饌，而且仲加入咗陳師傅嘅得獎名菜。幻想吓置身於冰藍嘅海底世界歎優質美饌，夠晒涼透心呀！
米芝蓮星級大廚設計
相信好多美食達人對陳國強師傅都唔會陌生，陳師傅曾任米芝蓮中菜餐廳嘅總廚，擅長炮製粵、京、川、淮揚菜，而且創意十足，不時有心思創作，所以無論喺國內定本地嘅飲食界都獲獎無數，當中包括「中餐烹飪世界錦標賽2015」、「全港青年廚師2018」等等。
性價比高！ 海洋公園 6及8道菜晚市嚐味菜單
由陳師傅精心設計嘅「夏季嚐味菜單」，特別注入多種新鮮時令食材，如海鮮、蔬果等，務求做到健康、清新嘅感覺，令人食慾大增。佢亦貫徹海洋公園對海洋保護嘅堅持，嚴選可持續發展嘅環保海鮮入饌。
主菜用上由澳洲龍蝦配酸酸地嘅青檸製成嘅「三葱香檸澳洲龍蝦」，以洋葱、乾葱、青葱炒香後加入由奶油同青檸汁調配嘅醬汁；微酸嘅青檸汁清新怡人，龍蝦爆香後鮮味加倍提升，鮮嫩滋味。「蟹肉伴蕎麥涼麵」就大玩日韓fusion，將日式彈牙蕎麥麵配鮮甜香口嘅韓式凍雞湯，涼浸浸感覺當堂令人降溫。另外，仲有特別以精選A4鹿兒島和牛炮製嘅「雞㙡菌醬爆鹿兒島和牛粒」，配上來自雲南嘅野生雞㙡菌，健康有營，跟日本鹿兒島A4和牛粒同炒，肉嫩juicy！
而其中「龍帶玉梨香」就由鮮嫩帶子配爽彈蝦膠及清香啤梨炮製，帶子以低溫56度水溫慢煮8分鐘，嫩滑口感充分保存，上面放上蝦膠，底層配香甜啤梨片，海鮮同水果嘅兩種鮮甜味道極夾！呢道菜仲係「中餐烹飪世界錦標賽2015」中嘅得獎菜式𠻹，必食推介！
套餐壓軸登場嘅有「雪膠仙翁米薏仁露」，選用類似雪耳嘅雪膠，爽口清甜；仙翁米（又名葛仙米）被譽為「綠色燕窩」，將兩種有營食材加入鮮奶、忌廉，冷卻後凍食，清涼怡神。呢款甜品滋陰潤肺、養顏美白，又可以解燥，今個月閨密生日飯局就等我同姊妹們嚟呢度慢慢歎啦！
「夏季嚐味菜單」六道菜及八道菜晚市套餐，分別每位$538及$728，喺海洋公園海龍王餐廳，猶如置身海底之中，食到咁豐富嘅星級套餐同得獎菜，性價比係咪高先！想食得盡興，自備靚酒，仲免開瓶費添！預訂晚餐仲可以喺黃昏6:30後免費泊車，先到先得，額滿即止！「夏季嚐味菜單」期間限定到10月底，想食就要趁早book喇！
不可錯過的得獎菜
單點美饌特別要推介「掌上明珠」（彩椒醬皇西班牙豚肉），呢款係海龍王餐廳廚師喺「全港青年廚師2018-中菜組」勇奪「最佳創意獎」嘅菜式，人氣鹹蛋黃鍋巴裝住嘅係以港式香辣爆炒醬炒香嘅豚肉粒，香口惹味之餘，fusion玩味亦好濃厚！另外，經典上海名菜「蜜汁火方脆千層」就由金華火腿先用冰糖蒸數分鐘減淡鹹味，方脆千層就用咗腐皮將油同蛋白逐層掃上，再用溫火以「油淋雞」嘅方法炸至金黃鬆脆，一咬口感又脆又香，好有驚喜，一定要試！
