酒店另類戰利品 贏輸兩面睇@杜遊珍

天天環保 明取Amenities

「咪話我撻嘢呀，Amenities 係for 住客嘅，咁我用完半支洗頭水，唔通由得執房阿姐掉咗佢咁唔環保？」平日連分類垃圾箱喺邊度都唔知嘅姊妹H說，「L’Occitane 已經唔夠矜貴，起碼要Bulgari 我先考慮帶返屋企，好似上海浦東四季搵意大利名牌Lorenzo Villoresi 特製的護理用品就夠特別啦，我日日都將佢收埋，等人換套新嘅，總共攞咗三套！」姊妹H又大讚澳門永利的套房，不但備有絲襪、髮圈， 連L’Occitane 潤唇膏都準備埋，咁有誠意，佢話惟有攞返屋企喎！

順手牽羊　老尷硬Pay

另一位姊妹S亦戰績彪炳，獵物之冷門，阿珍聽到亦嘖嘖稱奇，當中包括蘇格蘭東方快車的針線包（「鐵盒包裝，好懷舊㗎！」）；澳門五星酒店廁所用玻璃杯（「好有手感！」）；還有新加坡金沙酒店的梳（「聽講係職人製的檜木梳。」）

不過上得山多終遇虎，姊妹S亦碰過老尷時刻，「酒店的洗衫袋用來裝鞋和替行李分類認真一流，我都攞過唔少，唯獨是喺蘇梅失手，Check out 時為個布袋畀多五十蚊，認真失策。」另一單亦發生喺泰國，「布吉間Resort 對拖鞋鬆軟過馬拉糕，我一次過攞咗兩對！點知臨走時，酒店Marketing 同事尷尬地同我講拖鞋每對二百，當時我已經放喺行李箱的深處，面對一眾旅行社行家， 惟有扮大方地話：『哦，

OK吖，收唔收卡？』」

阿珍同姊妹H笑到甩碌，只係奉勸大家順手牽羊，後果自負啊！