海鮮迷 必試！尖沙咀最新餐廳 大玩工業風@Dining娜

有冇人同我一樣係 海鮮迷 ？朋友都知我無海鮮不歡，最近尖沙咀有間西餐廳翻新重開後即刻有好多朋友約我去試。餐廳由裝修至菜單選擇都加入咗新元素，俾人煥然一新嘅感覺。隱蔽於酒店地庫，地段方便，環境氣氛輕鬆，食物高質，好適合一班朋友聚腳，出名嘴刁兼高要求嘅我都要開心Share俾大家呀！

新裝修 新格調

講緊嘅係位於香港朗廷酒店嘅Bostonian Seafood and Grill。餐廳經過2個月大規模裝修後重新開業，設計以大地色同復古船塢素材為主，利用金屬鐵器結合同類風格吊燈裝飾及家具，配襯水泥牆同席紋橡木地板等，再加上復古飾品同埋當代藝術牆做背景點綴，即時呈現出充滿現代感嘅工業時尚格調。

共享美食概念

新裝修固然吸引眼球，但我最buy嘅其實係佢哋套dining concept。廚師團隊以「餐飲共享」概念重新演繹出Bostonian嘅餐單，呢種概念唔單止講緊大家同枱食飯分享美食，而係延伸至烹飪層面，由煮食第一步開始，廚師們就已經為食客精挑細選世界各地時令海鮮同環保食材入饌，煮法、擺盤都落足心機，希望將最優質、最鮮味嘅食物呈到客人面前。喺咁好氣氛嘅環境食住咁高質嘅西餐，仲要可以放縱地叫到成枱美食一班人Share，真係十級滿足！

我高度推介呢度嘅生蠔，有生食同烤焗2種烹調選擇，各有3款口味。

You and I新鮮生蠔（上）、Angels on Horseback香烤生蠔（下）

上圖色彩斑斕嘅生蠔You and I分別醸入北海道海膽、海苔、芝麻三文魚籽，口感清新，啖啖鮮味，好refreshing；下圖係香烤系列，生蠔上面鋪上煙燻意式煙肉、牛肝菌等材料焗到金黃，夠晒惹味濃郁。

最後記得留肚食甜品，蛋白酥同火焰雪山都係呢度招牌。蛋白酥以酥脆嘅蛋白霜做底，配上熱情果醬同新鮮覆盆子，再加上杏脆仁片、忌廉同白朱古力焦糖雪糕，香甜味美，同枱朋友仔個個都like爆；火焰雪山就最有噱頭，廚師喺海綿蛋糕同雲呢拿雜莓雪糕表面淋上法國香橙甜酒，再即席用火焰烹調，想製造驚喜點呢款甜品最適合不過。面對咁食香味俱全的甜品，相機食先是常識吧。

酒吧 X Party Room

主餐區有道手工製嘅黃銅mix紫銅裝飾牆，係餐廳signature，同時用作活動式隔間，分開主餐區同相連嘅私人廂房；另一邊廂有精釀啤酒酒吧，供應各式各樣嘅啤酒同Cocktail，舉行派對或者暢飲狂歡一樣適合。

Bostonian Seafood and Grill
地址：尖沙咀北京道8號香港朗廷酒店低層大堂
電話：2132 7898
營業時間：
半自助午餐 星期一至六 12nn-3pm
酒吧Happy Hour 星期一至日 5pm-8pm
晚餐 星期一至日 6:30pm-11pm
週末早午餐 星期日 11am-3pm