地勤不會告訴你的Upgrade秘密@杜遊珍
廣告
上星期聽到《新假期》旅遊組開咗個Page叫「一返工就想放假」，初時阿珍以為得啖笑，點知無耐人數就多過阿珍嘅一個Double，真係激死人。為咗致敬，今期就去踩場發掘話題，睇見佢哋記者曬命獲upgrade坐Qatar Airways商務，惹來粉絲悲壯提問：「究竟點先可以upgrade？我試過單拖著到斯斯文文咁check in，又試過勁遲check in都唔得嘅……」好明顯，呢位網友一定係誤信唔少網上流傳嘅「標題黨」文章，什麼「Upgrade坐商務艙10招教學」乜乜乜，其實離不開點列式「旺季旅行、衣著斯文」嘅老生常談，現實到底係點？
作為幕後操盤人、經手無數Upgrade Case嘅地勤姐妹E就歷盡滄桑咁同阿珍講：「有冇試過Upgrade、其實同有冇畀人暗戀過一様，都係睇你際遇嘅啫。」講到咁空泛，阿珍當然唔放過佢，E就補充「好多熟客都知道，有冇Upgrade空間、視乎班機有冇Overbook；早到定遲到機場，都唔係關鍵！」
網上傳言航空公司都會有張Priority List，E就話：「其實Loyalty客仔並唔係想像咁多，計積分、計里數之餘，單身上機加埋個樣有親和力，通常最著數，總之唔好煩到啲阿姐就最好。」不過亦有例外嘅時候，E就試過夾硬拆散兩個出差嘅銀行職員，仲要講到懶唔好意思話只能Upgrade其中一位，結果被選中嘅女士當場笑到合唔埋口，「唔梗要！我哋唔熟、同事嚟之嘛！」睇見呢啲人性大出賣場面、都OK舒緩到工作壓力o架！
分享多個Case：阿珍最近試過用mileage換國泰機票，check in遇上overbook，地勤問可否轉遲一班、另加一張upgrade coupon下次用；但阿珍唔想遲、結果對方問晒佢Priority List上所有人之後，有人肯轉，最終都上到原機，仲upgrade埋Premium Econ o添！
延伸閱讀：要出賣靈魂 梗係要靠西人@杜遊珍
