香港遊客一樣犯眾憎？ 日本旅遊 6大注意事項！|日本|
日本旅遊 港客半夜洗衫擾人清夢
Airbnb受害人剖白
隔離屋為Airbnb，居於日本嘅香港人成為受害人，被香港遊客嘈到瞓唔到。其實無論去到邊，所謂「夜闌人靜」，喺半夜都應該保持安靜。去到人哋地方，就應該入鄉隨族，唔好要人老奉遷就你。有網民批評港人嘅行為唔尊重當地人同文化，同強國人無分別。所以，作為守禮的香港人，記得要注意一下喇！
在 日本旅遊 最好注意的６件事
Airbnb受害事件得到好多人關注同討論，由於好多人對於日本嘅潛規則都唔太清楚，所以「在日香港人」就以自己住日本嘅經驗，寫出6項於日本旅遊需要注意嘅事。當中提到日本最基本的生活潛規則，就係唔好騷擾到人，藉此提提大家唔好影衰香港人。
1）請將音量收細
無論你住Airbnb定酒店，日本因爲地震防災關係，牆壁好少係石屎，多數係木材亦較薄，隔音差到你唔信。加上日本住宅區好靜，如果你開窗的話，隔離左右甚至隔離棟樓都會聽到你講嘢。而香港人一般説話嘅音量，喺日本已經係好大聲，所以真係要控制下自己嘅音量喇。
2）切勿係唔係都影
好多日本人其實對於被偷拍好反感，而日本手機同相機之所以無得熄影相快門聲，正正就係防止偷拍。就算大家並非有心影人，都可以注意返影相的時候鏡頭有無令人覺得你影緊對方，從而令人反感。即使喺商店想影相，都應該問准店員。
3）唔好以為無人識聽廣東話
作者見過好多次香港人大大聲批評店家商品食物、評論路人樣貌衣著，甚至係餐廳大談昨晚性事。其實日本有咁多香港遊客，識聽廣東話嘅總有一個喺左近，所以都係要收歛下⋯⋯
4）請到指定地方吸煙
如果想喺日本吸煙，就要去到指定地方。如街上吸煙區、餐廳的吸煙席及吸煙室。喺街上一路行一路食煙食係好擾人，正如喺香港見到有人咁做都覺得好乞人憎。
5）大型行李 避免通勤電車
日本通勤電車喺繁忙時間有幾逼？睇下面段片就一目了然喇。每個日本打工仔都希望準時返工，如果呢個時候遇上大型行李，絕對會受盡白眼。阻到人又辛苦自己，何必呢？
6）行路請留意路面情況
日本人其實有自己一套行路方法，行走方向好分明，大家只需要觀察大家行走方向，融入其中就可以。如果需要轉彎、掉頭，最好事前慢慢減速並慢慢往想去的方向移動，唔好突然轉方向，好容易撞倒人。如果真係撞到人或者被撞到，都應該帶愧疚表情點頭講聲すみません（Sumimasen)。
打個比喻，當街踎並唔犯法，但大家都覺得好討厭。潛規則就係就算你唔理，都唔會有警察拉你，所以Topic叫「最好注意的N件事」，唔係「一定要守的N件事」。其實大家只要旅行時唔好只顧住自己，花少少時間留意下身邊日本人做緊咩，都應該會sense到應該點做。
同場加映：大大隻簡體字 「京都的禁忌」
好多香港人選擇到日本旅遊，但中日文化不同，有機會觸犯當地嘅禁忌，對其他人造成滋擾。所以京都觀光局早前發出專門給旅客的「京都的禁忌」手冊，寫出針對外國旅客容易在京都犯的19項錯誤，大家下次去就尊重返人哋嘅文化，唔好重覆犯錯喇！
京都的禁忌
1.邊走邊抽煙
2.未經舞妓許可就拍照
3.自行開關計程車的門
4.亂丟垃圾
5.請用”OKINI”代替小費
6.不可穿鞋踩榻榻米
7.不可帶飲料進入餐廳
8.請勿插隊
9.請勿放餐廳鴿子
10.請勿酒後騎自行車
11.請勿隨手碰觸民房(物)
12不可並排走路
13.請勿隨處停放自行車
14.保持洗手間清潔
15.占用老弱婦孺專用座
16.請勿鐵軌邊拍照
17.請勿在神社寺廟大聲說話
18.請勿戴帽子進入神社
19.標有禁止攝影的神社寺廟不可拍照
京都觀光局
官方網站：http://kyoto.travel/cn/
有到日本旅遊前要了解的實用資料嗎？
日本是香港人最愛的兩大旅遊地點，去旅行前必看5大旅遊保險保障新冠肺炎的比較，另外為你推介日本10大好用電話卡，亦可參考日本8大Wifi蛋推介。當然亦要事先了解日本地區天氣、電壓、電源插頭、入境簽證要求及大使館電話。
