灣仔$35球Gelato雪糕店「Binger」12款口味：開心果/牛油果/蒙地卡羅朱古力

灣仔新開Gelato雪糕店「Binger」

最近灣仔新開一間本地手工Gelato雪糕店「Binger」，Gelato用上意大利原材料鮮製，不含添加防腐劑及人工色素，提供多達12款口味，筒裝$35起一球；杯裝$38起一球，價錢以灣仔地段來說相當之抵，而且份量十足，每杯都大大杯。除此之外，店內還有供應雞蛋仔、格仔餅、鮮果酸奶奶昔，格仔餅更可自選雙球雪糕，夾上雪糕更加邪惡美味！

$35球！12款口味：開心果/牛油果/蒙地卡羅朱古力

小店提供12口味選擇，必食首選是招牌西西里開心果，加入大量意大利100%開心果醬製，面層再撒上開心果碎碎，開心果味濃郁，充滿果仁香。另一款比較特別的期間限定牛油果味，雪糕質地好creamy，口感順滑細膩，面層仲有牛油果粒做點綴，賣相吸引。鍾意朱古力的推介蒙地卡羅朱古力，雪糕黏稠度較高，朱古力味濃郁香醇，每啖都好香朱古力味。另外仲有蘭姆酒味榛果、薄荷朱古力、海鹽焦糖、Mascarpone cheese、士多啤梨、芒果等口味選擇。