屯門發現號一日遊全攻略｜$50全日任搭！打卡、美食、親子3大路線

作為一個喺土生土長嘅屯門人，可以話畀大家知屯門真係無牛！不過屯門其實咩都有，打卡、美食、親子設施樣樣齊。除咗出城返工，其實放假留喺「輕鐵黃金圈」，都可以好chill咁過一日！所謂「無處不旅遊」，今次就將私藏的景點一次過大晒冷！

【網紅打卡之旅】偽櫻花x鐵路拍攝獨一無二的日系小清新寫真

如果說18區邊個區最有日本嘅感覺，必定非屯門莫屬！屯市唔止有Donki、鳥貴族、一幻拉麵，就連壽司郎都有兩間！而輕鐵沿線更有多個好有日本feel的打卡位，每年三月初宮粉羊蹄甲盛放，富泰邨明渠旁更會幻化成粉紅花海，同櫻花一樣靚！今次推介的網紅打卡路線由西鐵兆康站出發，再轉輕鐵，穿梭屯門區，沿途盡是IGable靚景，每個站都係拍照聖地，記得準備好相機，拍攝獨一無二的日系小清新寫真！

屯門發現號一日遊全攻略｜50全日任搭！打卡、美（圖片來源：FB@香港風景分享組Ada Hung授權圖片） — （圖片來源：FB@香港風景分享組Ada Hung授權圖片）

兆康站：三月初宮粉羊蹄甲盛放，富泰邨明渠旁幻化成粉紅花海，有如置身櫻花樹下！漫步河邊，輕風吹過，滿眼粉紅花瓣飄落，影相氛圍感爆棚。

屯門發現號一日遊全攻略｜50全日任搭！打卡、美（圖片來源：MTR） — （圖片來源：MTR）

藍地站：藍地新村牆上滿佈卡通壁畫，多啦A夢、小丸子，加埋村上隆花花同草間彌生南瓜，畫風繽紛，影相一流。沿住村內小路行，每個轉角都可能遇到驚喜，卡通迷朝聖必到！

山景（南）站：輕鐵站對面牆身有俄羅斯藝術家繪製嘅大貓壁畫，三隻貓姿勢各異，色彩鮮艷，站前可以輕鬆打卡。陽光照射落牆面，貓貓表情栩栩如生，好似隨時會跳出嚟！

蝴蝶站：蝴蝶站月台的對稱設計，站上行人天橋俯瞰輕鐵穿梭畫面，彷如置身日本鐵道景致。最靚係黃昏時分，暖陽映照路軌，影張背影相，文青感即刻滿瀉！

美樂站：蝴蝶灣泳灘唔止黃昏景色醉人，更有全港最大燒烤場，夕陽下燒烤，氛圍感滿分。細聽浪聲，望住天邊染紅，成班friend一邊BBQ一邊chill住睇日落，超療癒！

屯門碼頭站：海濱花園內的白色燈塔是電影《幻愛》嘅取景地，面對藍海，船隻飛機交錯，拍拖影相最啱。夜晚仲可以見到對岸燈光閃爍，海風輕拂，情侶必去！

【覓食嚐鮮之旅】海鮮 x 特色小店私藏美食大公開

屯門除咗有靚景，仲係隱世美食天堂！由麒麟站出發，沿途停站掃街、開餐，每站都有驚喜，分分鐘食到唔願返屋企！除咗要到三聖食生猛海鮮外，虹橋一帶更有超多特色小店，食足一個月都可以日日換款。今次就私心推介幾間餐廳，讓你由早餐、午餐、下午茶再晚餐宵夜直落！

麒麟站：「和生飯店」大排檔風味，燒雞皮脆肉嫩，糯米酒雞酒香撲鼻，客家小炒鑊氣十足。飯店人情味濃，街坊式招呼，食物分量足，保證食到肚滿腸肥！

蔡意橋站：井財街集合多款街頭小食，凱都戲院焦糖mix朱古力味爆谷，邪惡組合不能錯過。細街巷內仲有隱世粉麵店，湯底濃郁，魚蛋彈牙，性價比十足。

澤豐站：虹橋一帶小店林立，頂立的自家製烏冬店秘製鰹昆湯底，配冷萃咖啡層次升級；木玥巷台灣菜蟹肉明太子米粉，鮮香撲鼻。屯門人氣米線專門店「雲川」，以焦香豬頸肉，湯底濃郁香辣又唔嗆喉，每啖都充滿惹味。必試私心之選「家鄉銀針粉」，爽滑粉條配搭魷魚鮮香，再加埋菜鋪，簡單卻滿足感爆棚，一碗落肚，即刻元氣滿滿！

三聖站：三聖墟海鮮市場，每日生猛海漁獲任揀，買完可即場加工，即撈即劏即食夠新鮮！旁邊的大排檔入夜後更有屋邨風味。唔講唔知，除咗海鮮之外，識食一定叫菠蘿咕嚕肉，酸酸甜甜超好食！

【親子同樂之旅】玩樂同學習兼備一家大細開心放電

作為最早一批的新市鎮，屯門的屋邨眾多，社區設施亦與時俱進，絕對係親子玩樂天堂！由設館多年的屯門公園的爬蟲館，到近年新開的「籃球X平衡車」運動場，搭住輕鐵，一日就可以玩遍室內外運動場，更可以做手作及認識奇趣小動物，一家大細保證High爆！

屯門碼頭站：兆禧運動場，全港首個「籃球X平衡車」運動場，籃球場、平衡車賽道、遊戲地景，小朋友玩到唔願走。

三聖站：三聖廟建於1921年，供奉儒、釋、道三教祖師——孔子、釋迦牟尼同老子，係屯門街坊拜神求平安的熱門地點，亦象徵三教共融。隔離嘅麒麟石，更見證住青山灣由漁村變成新市鎮嘅歷史。不過最令人津津樂道，反而係石頭背後嘅靈異傳聞。話說70年代政府填海建路，原本想炸毀麒麟石，但每次開工，工人就無故集體生病，甚至傳出石頭「流血」的怪事，最後政府唯有讓步，將青山公路改道繞過巨石，麒麟石亦成功留低至今。