林淑敏許家傑回應《愛回家》每集薪金 幫口回應何晉樂「0蚊」傳聞

林淑敏許家傑回應《愛回家》人工傳聞

林淑敏和許家傑日前接受訪問時，被問到日前在網上盛傳的《愛回家》每集人工列表，林淑敏同許家傑紛紛表示真實收入同列表上的人工有出入，林淑敏同許家傑就指自己人工冇咁高。

當被問到飾演龍舟的何晉樂人工是否真的為$0時，林淑敏就笑指該薪金表出來的時候，何晉樂應該仲未出世兼未入行，所以零蚊人工就應該並不準確。

大小姐送水輝打情罵俏幫手解圍

許家傑之後亦主動開聲解釋，指自己的薪金與網上所流傳的版本有出入，林淑敏就即刻扮記者追問：「咁係多啲定少啲？你嘅薪金表好似係2字頭」，之後又追問「你一入行嗰陣幾多啊？」，搞到許家傑即刻尷尬地笑住反擊：「夠喇好唔好啊，你唔好做埋記者嗰份，人哋好忙㗎」。許家傑隨即反問林淑敏剛入行人工係幾多，林淑敏就自爆為剛入行值得$1500人工，打情罵俏輕鬆解圍。

愛回家｜網傳角色每集人工 有人拍1星期穩袋4萬2

近日網上流傳一張多個《愛回家》角色每集人工嘅列表，當中更將多位演員區分為男一及女一等界別，並貼出其預測嘅每集人工。列表中演員們嘅人工大不同，當中叫價最高嘅係歐陽震華嘅$22,750，其次人工最高嘅分別係列為男一嘅劉丹（飾 熊樹根）$6,000、男三周嘉洛（飾 金城安）$5,750以及男二單立文（飾 熊樹仁）$5,500。

不過有叫價最高就當然有叫價最低，列表當中何晉樂（飾 龍舟）嘅每集人工就竟然顯示為$0，令唔少網民都直言好震驚！

愛回家｜「池美麗」回應網傳拍劇人工

37歲的鍾凱琪因在《愛．回家之開心速遞》中飾演「池美麗」一角而成功入屋。在劇情中被安排去日本學廚後，自2021年起便暫時未再在劇集中露面。對於網傳拍劇人工，「池美麗」亦罕有現身回應：「其他人我唔知，但我可以好肯定我的不正確。」池美麗否定自己每集人工係500元，但她就冇講真實片酬係幾多，只亦感謝公司畀機會，更表示「人工當然希望高啲啲」。

愛回家｜網民連環猜測人工極參差原因

對於網傳嘅每集人工，隨即就引來唔少網民熱議：「根叔拍足一星期係咪淨袋4萬2」、「乜得有個做義工唔收錢咁偉大呀！」、「素素人工貴過女一？」、「啲植入式廣告咁重手，每人5000都畀得起啦」

不過亦有唔少網民表示質疑：「可信程度好低」、「加多個零就差唔多」、「我真係信特約$500，因為我都做過臨時演員真係得最低工資，而且剪到出場機會一個鏡頭都冇」、「一睇就知假啦」