有片｜YOASOBI演唱會觀眾企起身應援 屢遭投訴被4保安抬離場
坐位觀眾企起身 竟被保安抬離場
事發於昨日（26日）「YOASOBI live in Hong Kong 2024」亞洲博覽館1號展館（Arena）的左邊A區坐位。據附近目擊者所指，該名坐位觀眾在開場後就馬上企起身，手拿着應援筆燈（打Call棒）一起參與應援，但其舉止引來身後觀眾不滿，屢次向保安投訴。直到表演者唱到第4首歌時，5名保安走到該觀眾身旁，1名保安拿起手機拍攝，然後其他4名保安抬起該觀眾，打算用武力把他趕出場。
該觀眾不斷掙扎，甚至用腳卡在欄杆內，惟最終仍不敵保安而被抬走。據悉，該名觀眾最後在演唱會進行至一半後，才被安排返回座位，直至完場都有保安在正後方監視著。
馬上睇片
網民反應兩極
與此同時，該區域有不少人都目睹一切，有多名觀眾拍下影片表示嘩然「好大既官威， 唔唱到最後一首歌都無人再敢企起身」，留言區亦有網民表示驚訝「因為企而俾人抬走？香港主辦都算X出國際」、「因為有人投訴佢企係度唔肯坐低，之後半邊場去到最後一首歌之前都無人敢再企起身」、「吓企起身睇live就俾人抬出去好慘啫… 坐喺度睇不如唔好去現場睇…」、「第一次聽香港場唔俾企」。
多段影片上傳到Threads後隨即引起網民熱烈討論，不少人認為保安做法太過分，並指出睇日本歌手的演唱會理應就是企起身一起參與其中，而非安靜坐在座位上聽歌；不過亦有網民認為，坐位區域企起身會阻礙其他人視線，做法非常自私。有部份支持企起身的網民表示「唔比打call不如咪X入場睇啦」、「下唔係嘛，睇Yoasobi都要咁乖不如睇YouTube」、「睇Con唔企不如唔好睇」、「演唱會唔郁嘅話我返屋企聽Spotify唔好？」、「幾時睇concert唔比企？ 十幾年前睇五月天已經由頭企到尾」、「坐既唔好現場睇live了 等出碟啦」；而反對企起身的網民則表示「而家啲細路咩事？？ 幾時變左睇演唱會買坐位企係度睇先叫合理？」、「咁鍾意企買企位囉，企喺到咪阻住後面啲人睇囉」、「其實我買坐位就係預咗坐喺度睇，之前睇日本場要企足全程，根本就睇唔到，俾人遮住晒…」。
網民質疑保安不務正業
另外，亦有不少網民質疑保安選擇性「執法」，對於現場大量舉手機錄影演唱會的違例觀眾視而不見「規矩係寫到明唔俾影相同埋拍片， 我係咪可以叫保安夾啲舉手機啲人走？」、「有個拎dji osmo拍片，咁點計先」、「咁同樣嘅舉手機係到錄片都阻住晒啦又唔趕」、「呢啲保安又唔捉，走去捉人企」、「點解唔係拍片嘅人被抬出去？」。
小編翻查是次演唱會規則，確實有多條規則列明不可攜帶專業相機、錄影機或錄音機進行拍攝；而直至演唱會開始前亦有多次廣播提醒觀眾不可以進行任何錄影。
