銅鑼灣歐陸風麵包店 殿堂級酒店餅廚主理！蜂巢牛角包+立方千層酥盒
銅鑼灣歐陸風麵包店 殿堂級酒店餅廚主理！
銅鑼灣新開一間歐陸風麵包店，由入行超過20年、殿堂級餅廚Iqwan 主理，他曾任職世界各地多間文華東方酒店、麗晶酒店餅房總廚，造包實力毋庸置疑。店子供應一系列由他親自製作和設計的歐式麵包，好似賣相精緻的牛角包、丹麥酥、千層撻、立方千層酥等，其中牛角包更加是他畢生鑽研的領域，25層的牛角包外層金黃鬆脆、內層有完美蜂巢形狀，口感酥化，牛油味香濃，無論是傳統口味還是新派開心果、還是恆常的咖啡、紅桑子都一樣好食。
自家酸種麵糰 25層蜂巢牛角包
身為麵包大師，或多或少都有自己最喜愛的麵包款式，而Iqwan表示最喜歡傳統牛角包，因為牛角包看似做法簡單，但做得完美難度很高，他很享受這種挑戰性。他認為好食的牛角包要具備完美的蜂巢形狀、外脆內有韌性，層次愈豐富就是好的牛角包。
想做到一個完美的牛角包第一步就是酸種麵糰，Iqwan有自己培植酸種麵糰，雖然是秘方，但他亦有透露酸種是新培植，只有兩個多月，現時的麵包都會用上。牛角包一般花上3天時間製作，麵糰會用上法國牛油、法國麵粉、本地雞蛋混合而成，在4-8度的環境發酵24小時，再經過塑形、切割、烘烤等多重步驟，是心機之作。
5款牛角包口味 大推清爽開心果+紅桑子
店家提供大約5款牛角包口味，分別有原味、開心果、紅桑子、咖啡等，當中的忌廉醬就是由Wester負責，他入行6年，本身是西廚出身，當過私房菜、意大利菜、西班牙菜西廚，在醬料方面好有心得。牛角包他特別推介開心果餡口味，他認為坊間大部分都只是用現成開心果醬製作，好處是開心果味好濃，但食落比較黏口，而且比較油膩，所以他改良配方，選用日本和本地製造的兩款開心果醬，再加入吉士粉、吉士醬調製，保留開心果味道，但食落質感較清爽。
8cm高立方千層酥＋千層酥皮蛋撻
除了牛角包，立方千層酥也是Iqwan的得意之作，沿用牛角包酥皮麵糰製作，但放進特製的正方形模具發酵再焗，出來有大約8cm高，層次超豐富！推介開心果和士多啤梨餡，酥皮盒外脆內鬆軟，搣開有流心開心果餡，口感綿密細膩。另一款星星造型的千層酥皮撻，同樣用牛角包麵糰配方製作，蛋漿香滑重蛋味，蛋漿足料有9成滿，面層再唧上開心果醬、開心果碎碎，口感豐富，脆感十足！
日式湯種吐司麵包
除了酥皮類麵包，大家也可以試Weater 師傅主理的吐司麵包，用日式的湯種法製作，特別改良配方，湯種比例會多啲，減少攪拌後的麵糰會出現「結晶」(即是焗後放置一段時間會好容易變乾或變硬），湯種的好處就是減少「結晶」的問題，保濕之餘，焗後會更加鬆軟，所以店內的吐司做到外鬆內軟，有回彈力的質感。
- 餐廳：Bread Of Life
- 地址：銅鑼灣利園山道49-51號G及H號舖
- 營業時間：星期日至四 8am-10:30pm，星期五至六 8am-9pm
- IG按此
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
