床蝨入侵！K Kwong勸港人勿大驚小怪　5大重點要學識：其實同蚊一樣！

床蝨入侵令全港人人自危？　K Kwong：你唔怕蚊，更唔應該怕床蝨

化學博士K Kwong曾就疫情、天氣、核廢水等社會議題發表言論，解決了不少港人的疑問，而今次床蝨入侵香港的話題越來越多，有人連公共交通工具都不敢坐。K Kwong近日就因床蝨話題發表言論，希望大家不要大驚少怪。他指「只要有少少知識，你就會無咁驚⋯⋯首先同你講，如果你唔怕蚊，你更唔應該怕床蝨」，並帶出5大論點。

1. 床蝨/木蝨是甚麼？

K Kwong指「床蝨只係一種以温血動物血液維生嘅細小寄生昆蟲」，且分為2種，一種叫「Cimex lectularius」，會遍布全球；而另一種叫「 Cimex hemipterus」，主要出現於熱帶地區。K Kwong指香港2種都有，深水埗、官塘、荃灣、尖沙咀劏房「大把蝨」！當年他還是學生時，不論在巴士或是電車，都曾被蝨咬過，屋企更經常畀蝨咬。由於全球温室效應，北緯原本較寒冷的地區如美國、加拿大、英國、歐洲、韓國都有床蝨迅速繁殖的趨勢，但因為人們沒有見過這些熱帶地區昆蟲，所以表現得好緊張。

2.床蝨有何問題？

K Kwong指，床蝨吸完人血，會令人感到痕癢， 但未有證據顯示床蝨會傳染疾病。有床蝨的地方好污糟是由於床蝨的排洩物「又臭又一大PAT啡黑色恐怖點點」。但最重要的是，「如果你唔R個傷口(冇細菌感染)，好快就乜事都冇，所以唔好咁驚」。他指，床蝨最大的威脅，是咬傷人類後，人會自己因搔癢而「搲爛傷口」，換言之，忍手最緊要。

3.如何防止床蝨？

K Kwong再指，由於床蝨全部都是由屋企外邊帶回屋企，所有去完旅行的物品都要用洗衣粉洗乾淨、用番梘水加漂白水(勿抹金屬) 抹乾淨，亦可以用蒸氣槍蒸氣熨斗消毒，再放回衣櫃。

4.有床蝨要如何處理？

K Kwong指，道理與「你屋企有蚊點算」一樣，有床蝨就要先用吸塵機，「吸完再消滅淨返喺床褥上呢蝨，普通嘅洗衣粉水已經可以消滅成蟲，就算有蟲卵消滅唔到洗多幾次就得」。而不能放進洗衣機的物品，就可以用蒸氣熨斗、蒸氣槍、風筒亦可以，他指「一次唔得搞多幾次就得，小問題啫」！

5.坊間滅蝨工具一切拒用

而市民最常用來針對蝨患的方法，不外乎滅蝨彈和DE粉，K Kwong指「市面上有好多針對蝨嘅工具 ，例如矽藻土粉 (吸咗入肺有冇毒冇人知)、硼酸/硼砂粉(好毒，原本十零蚊一包而家炒到幾百蚊一支)、蝨怕水(有冇毒冇人知)、真菌滅蝨(話會令到啲蝨病死)，這些工具自己一樣都不會用，等同不會在室內點蚊香的道理一樣」。

網民留言求教方法　曾中招者強烈反對：唔識唔好亂講！

過千網民看到K Kwong的分享後，不少人留言求賜教，指「老師，佢哋繁殖能力比較強，而且係夜行活動多，可以徹底清理嗎」，K Kwong即建議用高壓蒸汽槍，指「可以，每日蒸佢唔見得你會輸」；亦有其他網民指「多謝K爺，免除心魔」、「感謝博士解釋！即刻放心晒」、「我係一個星期用一次高壓蒸氣槍蒸晒成間房連牆, 每日用熱水浸完衫先再放入洗衣機洗，已經好好彩早發現但係都要連續做三個月先殺死晒佢哋……」。

不過有更多曾中招的網民留言指「過程痛苦，唔係口講咁簡單」。曾中招的網民分享，自己最少花了數萬元才可解決蝨患問題，指「大佬，你唔識就唔好亂up，你試吓你屋企中一次就知有幾大鑊，如果講到咁簡單，就唔洗有咁多受害人要幾個月先處理到」、「嗰時我掉晒d被。枕頭，床褥。全部衫，窗簾都熱水洗過。全部傢俬噴藥消毒，自己都中咗毒。後來搬屋掉晒全部嘢。最少洗咗幾萬。留一粒蟲卵後患無窮，絕對唔同蚊！」、「我覺得屋企有木蝨，大獲過中Covid。Covid兩日好返，木蝨搞成個月，點會同蚊相提並論」、「蝨咬係痕過蚊咬，佢咬到你瞓唔到，行又唔舒服，叫人忍手點忍，好多人因為蝨而有情緒病，有無人會因為蚊而有？唔好當小事！」