一文睇清！秋冬外遊貼士「旅遊業賠償基金」5大注意事項
旅遊業賠償基金 保障合資格外遊旅客！
賠償基金係由旅遊業監管局（旅監局）管理。旅監局係由2020年1月成立嘅法定監管機構，負責有關旅行代理商、導遊同領隊嘅發牌同規管工作，亦會透過為旅遊業界舉辦不同嘅講座同培訓課程，致力提升業界嘅專業水平，確保消費者嘅安全同權益受到保障。
而賠償基金喺1993年成立，目的係為外遊旅客喺因持牌旅行代理商倒閉而損失外遊費及外遊發生意外時提供特惠賠償。自旅遊業新規管制度喺2022年9月1日全面實施；旅監局根據《旅遊業條例》（第634章）分別由前旅行代理商註冊處及香港旅遊業議會接管有關旅行代理商、導遊同領隊嘅發牌及規管事務，並從前旅遊業賠償基金管理委員會接管關於持有、管理和運用賠償基金嘅權力。大家記住一定要持有已蓋上有效電子徵費印花嘅外遊費收據先可以受到賠償基金嘅保障！
現在跟大家再進一步了解賠償基金嘅重要一環——電子印花徵費，解答5大常見問題！
1. 究竟電子印花徵費係咩嚟？點樣查核電子印花徵費係咪有效？
為咗令外遊旅客可以得到賠償基金嘅保障，根據《旅遊業條例》（第634章）第146條，持牌旅行代理商負有法律責任，需要就每筆已向外遊旅客收取嘅外遊費，向旅監局繳付相等於外遊費全數0.15%嘅印花徵費。當持牌旅行代理商繳付印花徵費後，旅行代理商所發出嘅收據上就會見到一個印有清晰顯示徵收金額及日期嘅電子徵費印花。
例子如下：如果你已向旅行代理商支付$12,000港元購買香港至杭州機票連當地酒店住宿套票，而收據上嘅電子徵費印花就應該顯示已繳交$18港元嘅印花徵費，就如下圖樣式。
如果大家在支付外遊費後發現收據上並無蓋上電子徵費印花、電子印花模糊不清、印花徵費額不足（少於已付外遊費全數嘅0.15%）或者收據同印花上所載嘅旅行代理商名稱和牌照號碼跟所光顧嘅旅行代理商不符，就記得要搵你哋光顧嘅旅行代理商更正喇！
至於大家如果想查核收據上嘅電子印花徵費係咪有效，除咗可以透過旅監局電子印花徵費系統嘅網頁（https://elevy.tia.org.hk/），亦都可以用智能電話或平板電腦掃描電子印花上面嘅二維碼（QR Code）。
2. 購買咩外遊服務先會喺收據上蓋上電子徵費印花？
根據《旅遊業條例》（第634章），外遊旅客指已向持牌旅行代理商支付外遊費購買關乎同一次旅程嘅任何以下各段描述的兩個或多於兩個服務及安排嘅外遊服務組合：
(a) 關涉在旅程中以任何交通工具提供的載運的服務，該旅程在香港境內開始，而其後主要在香港境外進行；
(b) 關涉在香港境外的住宿的服務；
(c) 某活動的安排，而該活動：
(i) 並非附屬於(a)或(b)段所述的服務；
(ii) 在香港境外進行；及
(iii)（如該服務組合包括該活動）構成該服務組合的主要部分。
持牌旅行代理商需要向外遊旅客發出蓋上電子徵費印花嘅收據。
根據以上嘅定義，旅客如果向持牌旅行代理商購買以下任何一類嘅旅遊服務，相關收據就不會蓋上電子徵費印花：
- 單獨購買機票、船票、巴士票的交易；
- 單獨購買酒店住宿的交易；
- 購買並沒有指明將用於兌換全部或任何兩項外遊服務組合的預付式旅遊禮券或旅遊現金券的交易。
3. 持有已蓋上電子徵費印花收據嘅外遊旅客，可以得到賠償基金咩保障？
如持有已蓋上電子徵費印花嘅收據，外遊旅客可以獲得賠償基金兩類嘅保障：
- 損失外遊費嘅保障：喺外遊旅客購買外遊服務後持牌旅行代理商倒閉嘅情況下，賠償基金可以為受影響旅客提供所損失外遊費90%嘅特惠賠償（按照簡化程序提出的申請所涉的最高款額為$15,000港元）。
- 喺外遊活動中遇上意外傷亡嘅保障：如果萬一不幸，外遊旅客喺持牌旅行代理商提供或舉辦嘅外遊活動中意外傷亡，係可以得到總數達$300,000港元嘅特惠賠償以報銷當地醫療、殮葬/遺體（包括骨灰）運返香港，以及親屬因旅客傷亡而往訪當地所招致嘅實際開支。每類有關開支都有最高嘅款額。
4. 外遊旅客透過網上旅行代理商購買外遊服務，會唔會受到賠償基金嘅保障？
只要旅客購買關乎同一次旅程多過一項外遊服務（即係第2題所講嘅三項服務中嘅兩項或以上）並有電子徵費印花收據，都會受到賠償基金嘅保障。
但係大家如果透過網站購買外遊服務，記住要留意該網站係咪持牌旅行代理商，同埋喺付款後，盡快向該持牌旅行代理商索取電子印花徵費收據。
5. 既然外遊旅客已受到賠償基金嘅保障，係咪都需要購買旅遊保險？
雖然賠償基金能夠為外遊旅客提供一定保障（即係第3題所講嘅兩類保障），但始終保障嘅項目同金額有限，外遊旅客出發前應該購買適合自己嘅旅遊保險，雙重保障自己嘅旅程！
