公屋住戶不滿鄰居門外裝CCTV 出入全天候被監控感恐懼 網民反讚鄰居？
公屋住戶投訴鄰居於門口設CCTV 每日出入壓力大至有心理恐懼：佢會亮燈！
帖主指，自己一早已發現對面單位於大門裝上貓眼CCTV，經過一段時間查證後，帖主都證實此裝置有錄影功能，每次出入開關門都會有「的」一聲，同時如圖所示亮起紅、藍燈，因而令到帖主本人和家人出入都備受心理恐懼，擔心亮燈時被錄影監視。帖主一家亦曾向大廈主任投訴但無人理會，對方亦放出一副懶處理的態度，令到全家都求助無門，壓力加劇。
網民反寸爆帖主：搭𨋢都有CCTV，你係咪要行樓梯
看到帖主自稱的苦況後，網民紛紛留言寸爆！大家都認為有問題的是帖主本人，指「搭𨋢都有CCTV，仲一定會錄影，咁你係咪要行樓梯」、「你估人哋會日日睇返錄影咩…係有事先會睇返。呢啲cam普通經過係唔會錄，除非你逗留同徘徊喺人哋門前，佢先會開始錄」、「一個cctv就令你心理恐懼，咁你平時出街應該無時無刻都處於恐懼之中」、「你身有屎？你本身俾人通緝緊？而家咁多賊仔我覺得冇問題喎」、「前排先話元州邨多咗爆竊案，人哋裝都係保護自己」、「你應該多謝佢添啦，有人幫你睇屋，有咩事都可以出聲幫手」。
帖主反駁：對面屋次次都睇住我屋企人出門口
面對一系列的攻擊，帖主即出聲回應，指「一直同佢哋都關係唔好一見面就嘈交啦，一早就反晒面甚至冇好過，佢哋又咁清楚我哋每個家庭成員啲出入時間，知道我哋咩性格，仲唔係成日喺度裝咁係咩？事實上我屋企的確有人較軟弱，有人較強硬，佢就係等啲強硬人出晒門口之後先恰我屋企啲軟弱人，呢啲仲唔係欺善怕惡？佢試過等我哋啲強硬派嘅屋企人走咗之後，佢叫啲保安上嚟玩嘢，仲唔係開始留意我哋？佢都試過等我啲強硬的屋企人出晒門口之後就企出門口鬧我哋足足五分鐘，一有啲強硬屋企人喺屋內佢就成隻鵪鶉咁。都係個句，你哋覺得我搞事但你哋唔係住喺度真係有苦自己知」。
公屋裝Cam合法嗎？
其實公屋住戶於門口裝Cam的爭議多年來亦不斷發生，根據房署相關資料顯示，並不允許公共屋邨租戶在大門外公共地方(例如走廊和梯間)安裝攝錄鏡頭，但假如是安裝在單位內則不受限，意即若CCTV是裝於鐵閘內就未必會被規限；若是安裝在單位外，而且拍攝到公共地方，安裝前必須先得到房署批准。
