搭巴士開傘擋太陽被串「麻X煩」　斥怕曬唔好出街　網民：新界人先明幾痛苦

搭雙層巴士被太陽曬到正　開遮擋太陽被拍照放網上

於Facebook群組「是日快快-巴士即日相」有一照片受到關注，事關有網民拍到有最少3名坐於上層巴士的乘客都不約而同地開遮擋太陽，更有人用宣傳單張「擋一擋」，以免被太陽長時間照著。照片在網上發布後，引來不少討論稱「喺車度開遮？好曬咩？」、「搭巴士都要開遮麻L煩」。言論惹來熱議，指「港島人或者市區人可能唔明，但住新界嘅新界牛就好明白，真係會好曬」、「其實真係唔好笑人，搭車西斜曬住好×辛苦」、「屯公搭九巴坐正車頭真係曬到眼盲，而且九巴冷氣好弱」、「佢地唔會明，有時喺屯公段路曬住真心好辛苦」、「太陽曬到正真係會好熱，用遮擋一擋真係差幾度」、「我都係巴士上見過，仲要係坐對面位！」、「我自己喺小巴都試過曬到傻還要塞車中，我都照開少少太陽傘，遮住自己但唔影響其他人情況下令自己冇咁辛苦而已，當自己唔覺得尷尬時，尷尬的就是別人！為咗別人目光難為自己受罪，太唔理智了！」

網民：點解啲新車唔加埋機場車嗰種太陽擋

有人明白被「乾曬」的苦處，但亦有人指「怕曬唔好出街」，令網民不滿，指「其實咁做對其他人無咩影響，點解咁都要串？」、「現在啲人真係有問題，別人開傘擋陽光都要咁多嘢講」。而另外有網民更指「唔明啲新車點解唔加埋機場車嗰種太陽擋」、「我見港島有部分巴士已有太陽簾，係咪得新界車無」、「建議巴士公司加單向反光玻璃」。

資料來源：是日快快-巴士即日相