外賣員倒瀉飲品點補鑊？！行內人自爆神還原黑幕！

Mar 29 2024

外賣員倒瀉外賣飲品隨地執餐補鑊？相信大家不時會在外賣平台叫外賣醫肚，對於外送員的甩單漏送已經習以為常，不過有網民拍到外賣員倒瀉飲品後，隨地執餐補鑊，倒回杯內繼續送餐，衞生情況令人擔憂。孰料畫面還歷歷在目之際，又有外賣員在討論區群組中，大喇喇地表示送外賣時倒瀉飲料，「只要唔比地下吸收都有方法還原」、「做手術唔好比人影到」，毫無職業操守，完全視衛生常識如無物，大家叫外賣真係要小心！

外賣員倒瀉外賣＋飲品執餐補鑊？！

有外賣員在「(香港)送餐/送貨員意見交流區」中發帖，表示自己在送外賣時，「一盒飯，盒上面上放一杯熱奶茶。果然又炒餐了，又洗袋」，因為外賣擺放得不好，未能妥善固定飲料在外賣袋，令盒面上放置的熱奶茶在運送時打翻倒瀉，而需要把保溫袋洗淨，當事人並無表示後續如何善後。但帖文下眾多外賣員都表示自己同樣試過「炒餐」，紛紛提出不同的建議互相提點，「呢個包裝方式就只能用一隻中指勾住，電單車就掛車頭勾或手柄。完。總之一字記之曰『吊』」、「私底下同餐廳講杯嘢飲同啲飯分開包裝」、「個結打實啲，杯飲品無乜位移動唔會咁易瀉，一盒飯上面放杯奶茶，除非杯奶茶一直保持置中位置，移過咗小小都容易瀉」，還有負責任的外送員表示會用膠紙紮實袋口，令到飲品不會移位倒瀉。