港男出帖鬧 長者大快活狂攞熱水 網民串爆回應：你先至係最廢果個｜飲食熱話

長者大快活快餐店狂攞熱水 港男出文想圍爐 反被網民串爆

香港世代之爭由關愛座蔓延到連鎖快餐店，有網民於Facebook「香港茶餐廳及美食關注組」討論區內發文，圖文並茂地批評「連鎖店的X老，兩個人滾水都攞4杯」，偷拍並出帖直指兩名老友記於快餐店用膳時多要4杯水的行為，帖文一出即惹來眾多網民群起攻擊事主。

「第一，你話人X老，你去到佢咁嘅年紀，你都會係咁。廢？你可能界佢更廢。第二，人哋攞幾多杯水關你咩事，影響到你咩？你無水飲？就算係出聲都係人哋連鎖店出聲，幾時輪到你？仲要擺上網？」、「我覺啲垃圾只可以由年紀差異，攞到滿足感已好膚淺及可悲．莫非佢哋好抗拒可以年長」、「正常咁諗，一杯洗餐具，兩杯用嚟飲，另一杯係知道食完飯食藥or俾spare水又得唔得呢……其實你又唔係佢地，點知佢地用唔到四杯水」、「老人家無地方去呢，長期屈著屋企好易病的，平常心啦」，事主圍爐不成反被大量網民攻擊，截稿前已不見帖文，估計事主刪文潛水！

長者長時間在餐廳佔位 用家無位坐致紛爭

凡事有正反兩面，有人會譴責事主偷拍在網上進行公審的行為，也有網民表示因老友記在餐廳長時間佔用座位而感到困擾，「老麥咪仲多，有無試過畀錢嘅無位坐，堂食變關愛座」、「屋邨老麥老人坐喺度凉冷氣，搞到無位坐」，亦有網民指不只老人家到快餐店坐，年輕人去咖啡店吹水長坐的行為差不多，為何不去審那些年輕人，而只針對長者，部分網民不同意：「coffee shop就飲咖啡既，快餐店就食飯既，人哋喺coffee shop買杯幾十蚊既咖啡坐低飲，同係快餐店拎幾杯免費水齋坐，你覺得有可比性？afford到嘅，咪學啲後生去 Starbucks買咖啡任坐囉，做咩要去快餐店阻人搵位食野？」兩邊網民爭論不休，世代之爭，似乎沒完沒了。