的士車窗插兩支香掀熱議！發文者遭狠批無知被叫刪帖！結局神反轉｜網絡熱話

網民斥責樓主無知要求刪帖

樓主於「香港馬路炸彈資料庫」分享了一幅相，相中是一輛市區的士的「背影」，的士前座左邊車門插著兩支用來拜神又燒著了的大香，「搭的士時燒住2支大香，係乜嘢儀式 ？」有網民語帶不屑地指責樓主，「你仲要影埋相」、「呢啲常理咁顯淺，難道貪得意咩？問這問題的是小孩嗎？」、「而家啲人咩都問，無知好可怕」。

網民分享親身「帶路」經歷

未幾，有網民仔細回應，「引路香，我親身試過，去殯儀館取骨灰，然後手提引路香，坐上私家車，再去長生店，要利用支香通知先人」、「我老豆走哂嗰時咁樣由殮房帶佢返屋企」，更有網民大讚的士司機好人，「而家引路香做法是弄熄支香，返去點返著，司機都幾好人」。

司機願接白事獲網民激讚

在得知插香與白事有關後，不少網民紛紛讚賞的士司機「心地好」，「唔係個個的士司機肯做，呢位司機好好人」、「多謝司機肯載」、「遠唔接、近唔接、交更唔接、白事唔接，讚下司機肯接」，有網民看得開心地回應，「的士都係食四方飯，何須介懷是否白事，但求無愧於心，通常苦主下車時會畀封利是，大家利利是是，平安大吉」，似乎是行內人的心得。

好人好事令風向逆轉

隨著愈來愈多網民因樓主的分享得悉的士司機的「好人好事」，「真係第一次知，又長知識了」，風向逆轉，「我覺得唔使刪帖，知道嘅一定經歷過，唔知嘅係未經歷過或無做傳統方式，留喺度等多啲人知都好，至少他日見到，唔會亂指指點點同笑」、「唔緊要啦，唔知真係有咩出奇，又無人教，好多後生仔都唔識老人家規矩，搞下搞下好多嘢都失傳」，樓主亦在帖子更新回應，「多謝咁多位解答，原來同白事有關，此帖並無唔尊重意思，留低畀大家學嘢，以後唔使大驚小怪」。

原文：

資料來源： FB@香港馬路炸彈資料庫