酒店職員鬧香港客低質！成日搲著數愛投訴 住客反擊：要懂得感恩｜網絡熱話

酒店界大鬧香港Staycation西客 愛投訴搲著數

有酒店員工在Facebook專頁「酒店Secret」發帖狂鬧，話好多KOL及Blogger不斷鼓吹「住平酒店」，好多「白癡香港人」有樣學樣搲狂著數，結果搞到酒店業界好難做！

內文鬧香港人好鍾意左搲右搲，每次都要在Facebook群組批評酒店服務優劣、討論生日有無講生日快樂等等問題，大鬧香港人應該反省下「自己畀咗幾多錢去享受依啲服務」，不要將快樂建築在別人身上。

酒店員工指客人大鬧同乞兒無分別

另外該酒店員工順便提到曾引起轟動的「航拍機偷拍酒店住客洗澡」事件，大鬧事主貪小便宜，「同乞兒無分別」。他認為當時酒店已經代為報警，又提供延長退房、免除房間費用等服務，事主依然要上網狂鬧，只為圍爐取暖，炫耀自己成功爭取免費住宿。

酒店行家認同：唔住好似會死咁

部分酒店從業員好認同貼文所指，話香港人劣品性事蹟「寫出嚟厚過本聖經」，又指香港人需要酒店，多過酒店需要香港人，「冇晒啲酒店睇下佢哋會點，個個唔住好似會死咁」，似乎對住香港客怨氣相當大，無處發洩。

疑似「鼓吹住平酒店」群組管理員反擊

該貼文言詞犀利，更半點名責罵各位KOL及Blogger，其中疑似被指控「鼓吹住平酒店」的Facebook群組「Staycation HK Hotel – 留港宅度假本地酒店住宿優惠」管理員隨即出Post回應反擊，話酒店減價維持生意好正常。

至於話「酒店客西客多」，他認為行行西客都多，「莫非佢哋想變成航空業，一日見一個客人入嚟都難？」，反指酒店員工應該少啲西面，「會唔會少啲投訴？」。

香港客嬲爆：成個酒店行業靠緊香港人

有香港人同聲同氣留言支持，話「冇班白癡嘅香港人幫襯，你哋應該冇工開！你地成個酒店行業靠緊香港人，有時講嘢客氣少少」，又有人表示「冇人逼佢（酒店員工）」、「唔想服務人就辭職啦」，直接懶理酒店員工指控。

有香港人則有理講到明，長文回應指感受到對方工作壓力好大，其實疫情下大家都好難捱，有份工已經係贏家，「有幾多份工係唔辛苦冇壓力？」，又話的確有部分香港人鍾意無理取鬧，不過一買一賣的交易下，實在稱不上「將快樂建築喺別人身上」。

亦有香港人表示難忍酒店員工過份指責，話對方「淨係將酒店業嘅困難歸咎俾客人，從來無諗過自己做乜可以令自己行業起死回生」，與廢人無分別，直接懷疑對方智商有問題。

資料來源：GOtrip