48歲楊千嬅紀錄片自認好勝講到喊 陳奕迅爆二人嗌交多過食飯句句有骨

陳奕迅重提被楊千嬅吸引

楊千嬅與陳奕迅認識多年私交甚篤又傳過緋聞，紀錄片中他分享二人相識經過﹐因95年第十四屆新秀歌唱大賽結緣。他形容千嬅性格倔強，有「大笑姑婆」之稱卻不太愛笑，他說；「呢個就係當時吸引到我嘅地方。」他又形容千嬅夠「男人」：「咁多年佢都冇變過，都係『喂！陳奕迅！』，其實我覺得有少少粗魯㗎！」Eason又提到與千嬅經常意見不合：「我講東佢講西，我就真係有嬲！你會識得多過我？我假假地都皇家音樂學院，有文憑，我係八級聲樂喎，同我拗？我係冠軍喎！」

自認好勝唱得衰 叱咤冇獎即刻捉同事開會

楊千嬅曾8次奪得「叱咤我最喜愛女歌手」，是樂壇上的紀錄保持者。她在紀錄片中自認好勝：「做artist唔好勝，做嚟做乜？1月1日（叱咤頒獎禮）冇獎嘅話我第二日即刻捉（唱片公司）同事開會㗎！」她又自認唱得衰，但要知道自己點解輸：「有段時間我係唱得衰嘅，我必須承認。我要知道自己點解輸，我先可以繼續進步。」

楊千嬅講到眼濕濕

楊千嬅又表示，初初出道的自己心口掛個勇字，但時至今日已經不再如初，認為自己最初非常「平凡」：「當我得到好多批評嘅時候，我會覺得係唔係我唔夠好…淨係心口得個『勇』字係真㗎，因為我只係相信，只係用『爭氣』兩個字去強迫自己，死都要練好，死都要點點點，甚至走到今日，我望返轉頭原來當初嘅unknown，同咁冇自信先係人哋最欣賞嘅地方，就係所謂嘅平凡。」及後，千嬅更講到眼濕濕：「呢啲無數嘅平凡好難搵番轉頭，原來平凡係咁唔平凡嘅一件事，即係人哋唔會再以平凡嘅角度去睇我，因為我好想我個仔平凡！」

網民反應兩極 直言：過主啦！

楊千嬅紀錄片一出，網民持不同意見，fans們留言：「我也期待已久」、「開心！終於可以睇到！！！」、「終於有啦! 等到頸都長」、「無懼閒言閒語，永遠都會支持你」。但亦有不少網民反感，直言：「過主啦」、「無興趣！」、「香港歌迷真的不重要嗎？點解芒果TV比YouTube早播？真的令香港樂迷失望」。

多張楊千嬅入行前舊照曝光