日本食品、藥妝滿5千免稅　1/10新制上路　疑團大拆解@杜遊珍

Sep 22 2014

哈日迷正熱議的，一定是10月起日本的免稅新安排。現時免稅的家電、服飾外，照舊買滿10,001円（約HK$713）才免稅，而新制最大分別是，新增了食品、飲品、藥品、化妝品等免稅項目，5,001円起（約HK$357）即可慳番8%的銷售稅，加上日圓持續低位，買嘢變相七五折有多，入秋去掃長腳蟹美食名產、買妝藥手信換埋季，實在正！點先免稅？只要到貼上「Japan・Tax-Free Shop」的商店，在當天消費達指定金額，填新表格，即場可以免稅價付款。17頁的免稅店列表中，大部份都是大型百貨與名店，亦覆蓋東京、大阪、京都、札幌、福岡等範圍。不過每人需求都唔同，就等我阿珍試試盡力解答！

免稅疑團大拆解

邊位	即時反應	阿珍點評
盲搶果粉	正呀！買iPhone6免稅！！！	其實iPhone6原本就已經屬免稅品o架喎……
靚靚OL	似乎連鎖藥妝店無份喎……	嗱，去大牌百貨公司買都是免稅的，但藥妝類卻未必有特價，要再格價先知喇！
心急娘親	咁即係邊間百貨免稅呀？	三越、大丸、SOGO、西武、東武、Lumine、丸井、松坂屋、松屋、京王、阪急、東急，統統有份！
水貨客	我要掃盡所有日本奶粉！	冷靜！！！消耗品如奶粉等購物額的上限是50萬円，咁你都買到180罐嘅……
龍友們	想去入日本限定的菲林款喎！	可以！新增免稅商店中就連bic camera、yodobashi同秋葉原softbank都有份！
餵食妹	YEAH！我要日日食晒所有日本百貨買到的名產！	免稅商品需要用不能拆封的包裝，限定30日將商品帶出日本，那看來，食物是不能當場吃了……
日系潮童	不可拆封？要袋實潮服？咁咪無得即著？！	講清楚，新例只係飲品、食品、與妝藥品需要入袋！潮服可著！
陪買老豆	去機場退稅要咩手續？個個機場都有得攪？會否有排攪？	條例寫明，check in後過關時，海關或會依據你帶出境的免稅品清單查看行李，但正常情況嚟講，鬼得閒個個逐件查咩。
飲品控	液體過唔到關喎！	暫時來說，新制仍未很清楚講到免稅品能否在海關檢查後再託運，1/10先有答案了。
旅遊組同事	如果想船運戰利品返港點計？	放心！郵局付款時會有單據證明你已寄出免稅品。