高Ling住酒店遇污糟嘢 旅行集體出事＋遇到冇樣嘅和服女人
撰文：AY｜圖片來源：IG@alexfongliksun、IG@sammkoling、YouTube@myTV SUPER截圖｜原文刊於：GOtrip
高海寧大爆住酒店經歷 酒店遇污糟嘢/旅行集體出事
原本在收費平台myTV SUPER播放的《鬼上你架車》第一集請來高海寧（高Ling）做嘉賓，高Ling更一次分享多個靈異經歷！
1.高海寧與家人去北海道恐怖經歷
高海寧指該次是與家人到北海道遊玩：「去咗一間位於山谷嘅溫泉旅館，當時係同媽咪住同一間房，咁一打開門係對住一條好長好直同好深嘅廁所，已經有啲不舒服。」然後當晚與媽媽落去浸溫泉，經過一間房：「間房好黑，見到電視機畫面閃下閃下，同有兩個人用日文嗌交，我阿媽好八卦，我阿爸就叫佢咪多事。」之後高Ling就無理，先去浸溫泉便回房間睡覺。
當晚高Ling瞓覺時，媽媽突然見到有個女人著住和服望住佢：「突然間佢唔郁得，然後掙扎、當時佢（媽媽）望向窗出面，見到有1個身穿和服但係冇樣嘅女人喺窗出面，佢就合埋眼，之後再打開眼，和服女人就係佢面前。」小方與當奴聽完都嚇到「咿嘩鬼叫」！最後到天亮，高Ling媽媽可以郁動，立即同家人離開酒店。
後續連環不幸事件
但高Ling指事件未完：「我Daddy有一日爬高拎嘢，feel到有人喺前面推佢，然後成個人跌落地，睇咗好耐醫生、跌打，因為跌至內傷。」除了爸爸出事，就連高Ling兩位弟弟都瀨嘢，「兩個細佬喺學校，分別喺走廊同洗手間又係feel到有人喺前面推佢哋，仲留咗疤痕」而高Ling就持續高燒，無論睇中醫、西醫都退唔到燒。直到家人去黃大仙拜神至退燒。高Ling指事件發生時是17歲。
2.高海寧讀書時期靈異事件
高Ling的屋企好猛鬼！遇上神秘男靈體！
高Ling指讀書時期發生不少靈異事件，她指冬天都喜歡蓋很厚的棉被，覺得好有安全感，「有次竟然凍醒咗，原來我同張被中間，有一道冷空氣，即係佢（棉被）浮起咗，所以就凍醒，然後我又係郁唔到，嗰次係聽到聲，因為我讀基督教學校，團契嘅人教我遇到呢啲事要祈禱。」
方力申和當奴大嗌好驚
高Ling指：「祈禱時有把聲喺我耳仔邊……好近好近，同我講話『耶穌唔得閒理你』；突然嗰吓好驚啦，因為我媽咪拜佛，我就講咗句『南無阿彌陀佛』，跟住佢話『佛祖都唔得閒理你』……係把男人聲嚟，你明唔明？因為我嗰排考緊試好攰，個人好需要瞓覺、好忟，心裡面就爆咗一句粗，跟住張被漏咗氣咁跌返我身上。」方力申和當奴大嗌好驚，指高Ling的屋企好猛鬼！
3.高海寧酒店隔離遇到污糟嘢
高Ling分享最近到內地酒店隔離的經歷，「我之前喺廣州嘅酒店隔離，我哋total有4個人入𨋢，我加3個男人。跟住到我撳𨋢嘅時候，撳極都撳唔到我嗰層，其中2個男人出咗𨋢，我就撳到我嗰層，但同時間著多咗兩層嘅燈！我同剩返底嘅男人對望一下，點知到咗我嗰層部𨋢又唔停，直接pass咗，然後我哋又互望，之後部𨋢終於停咗，但只係佢著嘅層數停。
高Ling指當時諗緊出唔出𨋢好：「因為唔係我去嗰層；於是再撳多次我嗰層，撳到然後到我嗰層終於停咗，我好驚好驚，即刻衝咗出去，當我行返房時，𨋢入面嘅男人突然衝咗出𨋢追喺我後面，我心諗想點呀？跟住佢同我講『我好驚，成個背脊都好寒﹗』我話無嘢幫到你，佢話純粹想喺度平復一下心情，咁我就返咗房！」
