口罩小姐│曾志偉借姜濤不遂指ViuTV走偏門冇收視 193@ERROR一句KO：佢哋畀啲老嘢睇㗎嘛！

撰文：東方新地 圖片：ViuTV電視截圖、193IG圖片

口罩小姐口碑勝大綜藝

ViuTV的《最後一屆口罩小姐》非常創新，觀眾亦睇得好開心，總決賽當晚撞正無綫首播的《開心大綜藝》，收視未知如何，不過鬥口碑ViuTV肯定跑贏，因為無綫被網民插爆繼續炒冷飯毫無新意。

曾志偉妄想借姜濤

最近ViuTV來勢洶洶，無綫受到威脅，新上場的曾志偉就急住去整頓綜藝節目，早前在超級綜藝記者會上，因鄧智堅扮演姜濤被其粉絲群起聲討，新節目繼續包含扮嘢環節，曾志偉日前回應此事時竟自爆曾向ViuTV借姜濤，他說：「我記得第一日到TVB返工就即時打去問魯庭暉（ViuTV台長），姜濤可唔可以借？當時魯庭暉話梗係唔得啦！老爺，遲啲再傾啦！哈哈！」借唔到姜濤，曾志偉再暗指ViuTV不是無綫對手：「翡翠台係面向全球華人，節目要以合家歡為主，符合大眾口味。白啲講ViuTV得4點收視，節目題材比較偏，唔係翡翠台路線。我哋選香港小姐就係香港小姐，唔會戴住口罩，所以J2台先係同ViuTV比較收視嘅地方。」

口罩小姐後台隔空開火

對於曾志偉暗指ViuTV不是翡翠台的對手，口罩小姐又唔夠香港小姐有認受性，ERROR四子在口罩小姐總決賽後台回應，提到節目與TVB《開心大綜藝》對撼，肥仔表示兩台觀眾層面不一難以作比較，193笑言打唔贏對方，阿Dee則自嘲：「冇理由用財經新聞台對教育電視。」而講到曾志偉指ViuTV題材偏門只可與J2台比較，193就隔空反擊：「J2咩嚟㗎？後生仔傾吓偈嗰啲？40幾歲仲後生仔？」明寸已年過40歲的無綫主持六號陸浩明，193寸爆說：「佢哋畀啲老嘢睇㗎嘛！我哋係咩年齡層都有。」更指所謂的「收視」亦只得幾百部電視去統計，不用理會。