在美孚尋找富良野@DINING娜
藍藍天空高掛我的夢，就算日日掛住個大太陽我都冇有怕，最緊要天氣好呀嘛！天氣好、心情好就梗係要同班姊妹歎個靚tea啦。自從上個月同班日本friend試完旺角小木屋嘅北海道牧場餐廳，心思思其實好掛住嗰到啲炒蛋。
上網見到佢喺美孚開咗新舖，又有藉口同幾個姊妹去食，順便試下啲新嘢嘛！一入去其實已經覺得好舒服，舖頭藍白色嘅主題簡直同個好天氣襯到絕呀，而且又有高櫈座位，想寫意歎tea完全冇難度。
今個月佢哋推出全新fusion下午茶，結合咗香港味道同日本食材，創出自家style嘅美食，冇理由唔試下㗎？4個女仔6個胃（我有3個），叫到成檯都係嘢食，熱狗、牛角包、特餐、漢堡扒、西多士樣樣齊，好彩食極唔肥，唔知仲以為我哋生「為食積」。
唔好俾熱狗個綠色醬汁嚇親，試真啲係用咗芥末醬同蛋黃醬嚟調配，蛋黃醬中和番芥末醬強烈鮮明嘅味道，2個醬夾得嚟又唔會互相搶味，夾埋條芝士雜肉腸，啱啱好！
炒蛋火腿牛角包未上檯都已經聞到陣香味，原來係3吋炒蛋三文治演變出嚟嘅新菜式，拿手炒蛋加埋牛油味甚濃嘅牛角包，又脆又香，冇得彈。
最後KO埋個北海道特餐，保持水準嘅作品，拿手炒蛋香滑流心就唔使講，juicy到不得了嘅半肥瘦叉燒、3.6牛乳加雞湯煮成嘅通粉，再加埋錦上添花嘅丁丁蒜味，啱晒我dining娜，食都要食得刁鑽過人。
北海道牧場餐廳
地址：美孚新邨第5期蘭秀道1-15號9號舖地下 （顯示地圖）
（全線有12間分店）
