鄭中基做廿四孝爸爸陪女學新樂器 事隔18年新劇拍張可頤有火花

原文刊於《東方新地》

鄭中基事隔18年再拍劇做慈父

鄭中基表示自己對上一次拍劇已是18年前，所以他一開始很擔心體力難以應付：「 但今次拍劇所有安排同時間上都好舒服，每一個演員都有好充足嘅時間休息，所以開始咗拍之後就冇咁緊張。」

唔肯再做《美女廚房》劇癮起做慈父

據知情者透露：「其實上年年中ViuTV籌備開拍效法無綫《美女廚房》嘅遊戲烹飪節目，已經傾Ronald做主持，但Ronald就講明再做一定要搵埋小方、Edmond（梁漢文）一齊合作先拍，當年《美女廚房》大受歡迎，呢個鐵三角合體好貴，而且Viu嗰邊亦唔想完全copy無綫節目舊瓶新酒，最終傾唔成，不過Ronald放聲氣願意拍劇，對Viu嚟講絕對係好消息，睇番Ronald擔正拍劇，已經係02年嘅《我要fit一fit》，近年佢喺電影發展順利，再拍劇幾乎冇乜可能，不過Viu就畀好大自由度佢，角色亦為佢度身訂造，上年游學修監製ViuTV劇集《仇老爺爺》，已經搵過Ronald客串一集，今次Viu斟Ronald合作，角色好討好，係個任勞任怨嘅慈父角色，佢睇完劇本超級鍾意！」早已是廿四孝慈父的鄭中基，當然好願意將自己真實一面同觀眾分享，難怪ViuTV能夠成功打動他再拍劇！

鄭中基劇癮起拍男版《暖男爸爸》 方皓玟被飛唱作CP合拍無望

近年自家製作引起不少回響的ViuTV，成功打造一班《全民造星》小鮮肉，亦不斷同無綫搶人拍劇，先後已有林保怡、鄧萃雯、陳錦鴻、鄭少秋及陶大宇等無綫昔日戲王戲后過檔做外援，近日更成功羅致離開無綫八年，TVB視后的張可頤加盟，拍住鄭中基演出新劇《暖男爸爸》。不過，張可頤擔正，就踢走同樣想拍該劇入屋的方皓玟；原來ViuTV傾洽張可頤前，本欲搵唱作女歌手方皓玟擔演女主角，與鄭中基延續唱作CP入屋做埋熒幕情侶，不過，視后答應助陣演出份量十足，演戲經驗淺的方皓玟即時被叮走！

兩手準備無奈飛起方皓玟

據知情者透露：「一個劇嘅成功，除咗劇本之外，男女主角都好重要， Ronald（鄭中基）答應接拍之後，Viu高層就努力斟張可頤做女主角，但因為套劇始終係男人劇，女主戲份冇咁重，監製都擔心張可頤未必會接，所以都兩手準備，監製同時傾唱作女歌手方皓玟拍Ronald，因為佢兩個合作做過演唱會，樂迷對佢哋呢pair唱作CP好受落，本來Charmaine（方皓玟）已經答應演出，但因為最後張可頤落實接，對套劇嚟講，多個演技派女主助陣，當然係一個好消息，監製都無奈飛起Charmaine！」

張可頤事隔8年再拍劇TVB劇 與宿敵宣萱打對台

對上一次拍無綫劇，已經是12年的《天梯》，當時男拍檔陳豪近日正與宣萱忙於拍攝無綫新劇《陀槍師姐2020 》，難道真是一山不能藏二虎，與宿敵宣萱命中注定要打對台。據知情人士說：「自從試過患甲狀腺功能亢奮，要喺事業高峰期停工兩年休養，可頤體會到冇嘢比健康重要，依家就算接劇，佢都唔會畀自己太過勞累，所以近年佢都係客串拍吓內地劇，貪時間安排上冇咁緊迫，今次拍Viu劇，佢除咗睇咗劇本好鍾意個角色，另一方面亦好想同Ronald合作，所以就算戲份冇男主角咁重，佢都唔介意，覺得最緊要角色有得發揮！」

魚與熊掌不能兼得，唔知觀眾又想睇邊個多啲呢？