首先你要有……電！行動電源新科技 @ Gadget專男
廣告
智能電子產品緊扣住我哋嘅生活，但係無論你用手機、平板、電腦，首先你都要有……電！因此行動電源（尿袋）應運而生，但係尿袋都要叉電，如果出外無晒電點算？有人就發明咗全球最細小嘅行動充電器，呢個名叫Nipper嘅充電器透過電池幫手機充電，只要有電池就唔怕無電。Nipper變身前係一個鎖匙扣，變身後連接兩粒AA電池就可以為手機充20%左右嘅電量，最啱旅行出外時以便不時之需。而家產品仍喺kickstarter集資階段，但其實佢個原理好簡單，相信面世之後好快會有「強國致敬版」。
空氣都充到電？
另一個kickstarter集資項目就更加吸引，就係Solar Paper充電器，顧名思義，即係利用太陽能板吸收光能為手機充電，體積只有9 x 19 x 1.1 cm，而喺光能足夠嘅情況下只需2.5小時就可以幫iPhone 6充滿電，真正「既環保又快捷」，第時遊山玩水都唔怕手機無電啦！
如果覺得用筆芯電同太陽能嚟充電好小兒科，咁就睇下呢個咩能源都唔使用嘅充電發明啦！早前美國創新科技公司Nikola Labs，就發明咗一個吸收無線電波嘅充電手機殼，原理就係收集wifi、3G、4G等無線電波能量轉化成直流電為手機充電，「咁咪即係就咁擺喺度都叉到電？」，係！之不過，如果咁樣，第時低頭族咪永遠抬唔起頭做人囉！
