【朱智賢勾人夫】臨盆黎太開腔代求情 黎振燁：「為養家厭惡性工作都照做」

原文刊於《東方新地》

朱智賢同黎振燁被拍車廂密會，又被影到兩人去醫院睇醫生，關係撲朔迷離，更有指已婚既黎振燁冷落腹大便便既太太，仲話男方有意離婚，不過繼朱智賢由男友謝東閔陪同回應一日後，黎振燁夾啱時間拖實老婆終於發聲。

黎振燁拖老婆現身海麗邨黎太大方回應 顯正印風範

昨晨十時許，有傳媒拍得黎振燁與黎太在海麗邨出現，當時夫婦一同穿著黑衣，手拖手逛著，黎太臉色略為蒼白但尚算精神，黎太被問到是否已原諒老公，她平靜謂：

「發生呢啲事，正常人都會嬲，但念在我哋有小朋友，又咁多年感情，希望佢公司都睇到佢咁多年付出，畀多次機會佢。」

而被問到小三朱智賢於記招上未有向她道歉，黎太大方說：「道唔道歉都唔緊要，我都擔心佢情況，希望佢快啲冇事啦！」正印風範出晒嚟！

暗示女方主動埋身 自詡「可以完全抽離」

至於還有否聯絡朱智賢，黎振燁意有所指謂：「其實我本身都唔會…唔會特別聯絡女同事。」言下之意莫非暗示一直都是朱智賢主動埋身？而黎亦直認自己犯錯：「講到尾都係我唔啱，唔應該畀藉口自己，依家最緊要希望佢(太太)心情同身體狀況好番，嚟緊相信我都會有段幾長嘅時間休息。」記者問到是否如朱智賢所講拍劇集《食腦喪B》抽離唔到角色而出事），他稱相信自己可以完全抽離，做番幾個星期前真正的自己。且強調與朱智賢關係經歷時間唔長。

黎振燁指這種事(出軌)一次都嫌多，他說：「老實講發生呢啲事係咪一時三刻、或者三兩日就可以完全冇事呢？咁我哋又唔可以輕易當冇發生過，畀啲時間太太，希望佢可以完全消化到件事，之後釋懷原諒我。我會行動證明畀太太睇，有啲事情人生中發生一次就夠，應該係一次都嫌多。」亦希望傳媒別再打擾臨盆的老婆。講到會否擔心被無綫雪藏、放棄，黎振燁直言：「我未必有機會再喺幕前演出，但小朋友就嚟出世，唔可以冇嘢做，就算體力勞動、厭惡性的工作我都要做，要搵奶粉錢，公司放棄我，我都唔可以放棄自己。」

一直與謝東閔拍拖甜如蜜的33歲朱智賢，近日為無綫劇《食腦喪B》開工，竟與劇中飾演一對的已婚港男黎振燁發展不倫戀！朱黎二人被拍到斷正車廂幽會，男的家有懷孕嬌妻，又正值無綫力捧，在《機場特警》仲要飾演「暖男」，現偷食自毀前程，在公司安排下，事隔一日女方竟然聯同事件中受害者謝東閔現身拆局⋯⋯

「抽離唔到角色」、「我都接受唔到自己」、「大家畀機會我」

事後二人接受自己公司的獨家訪問，進一步以游離眼神解說自己的「迷失」：

我覺得自己係一個唔專業嘅演員，我係因為拍劇而導致咁，我承認自己係因為唔夠專業、演戲經驗唔多，所以搞成咁時今日咁⋯⋯我覺得自己抽離唔到個角色（索鼻）⋯⋯同埋 好多謝Brian呢段時間陪住我，因為我知佢承受咗好多⋯⋯

堅持係「我一個人嘅事」 唔肯同人哋老婆講對唔住

主持人再追問朱智賢除咗謝東閔仲想同啲咩人道歉，畀晒位佢向黎太講Sorry ，但似乎佢依然唔肯講出呢句說話，仲扭波轉話題，講自己嗲哋：

我最想就係同屋企人講對唔住，我唔想因為自己嘅事影響到屋企人，我即時send短訊畀嗲哋，我唔想因為我一個人嘅事影響到屋企人。同埋我想同劇入面演員講對唔住、對監製講對唔住⋯⋯因為我影響到套劇，我真係好後悔、好內疚，我都接受唔到自己犯呢個錯⋯⋯

王喜恥笑、網民唔收貨 一面倒數臭「扮可憐」

對於兩段回應，網友都唔太收貨，在無綫做過消防員但抽離到做KOL的前輩王喜，更在 Facebook 上出帖恥笑：「抽離唔到角色？哈～～～比你撈到個角色鍾意食屎咁
阿伯母咪慳好多米飯？公司咁多過來人前輩做過咁多示範，你都毫無進步，以後點偷食，噢，sorry，點揾食？」

《食腦喪B》 角色有幾難抽離？

個局愈拆愈衰，黎生繼續冇影，至於《食腦喪B》到底設計了什麼角色令朱智賢抽離唔到？據了解此劇入面朱智賢個角色又真係幾淫亂，一女侍三男，劇中黎振燁都會被派帽！