31歲黃心穎食完馬國明轉攻富二代圈 戒淫失敗齊蔭轉運博翻身

撰文、圖片：東方新地

黃心穎向高層死𦧲 公司怕再出事唔肯派Job

偷食人夫許志安玩出火，姣精黃心穎事業形象一鋪清袋，東窗事發後即潛走美國，雖然外傳她改名轉行做金融，但實情對娛樂圈仍野心勃勃的她，一直等機會回歸，多得無綫開恩，幾部劇輪住重見天日，黃心穎便睇準時機在上年12月中返港，現身機場時谷盡眼淚扮可憐，但始終唔肯正面認錯，裝模作樣誠意欠奉終歸博唔到同情；為部署收復失地，更向無綫高層發毒誓承諾戒淫，強調日後會守婦道改過從良，並主動向無綫提出加簽合約，不過，隨住劇集《丫鬟大聯盟》收視不如理想，觀眾唔願睇佢，無綫方面亦未敢將姣精進一步放生。

據知情者透露：「為咗博翻身，心穎發毒誓話會 改過，以後唔會再亂搞男女關係，又主動提出同公司加簽合約，講明以後聽晒公司話，希望公司再畀機會佢拍劇，不過偷食人夫咁大件事，無綫畀佢搞到雞毛鴨血，又點敢輕舉妄動，始終心穎形象差都怕畀佢再拖垮公司，而且佢兩套劇播出之後，個個都話唔願睇佢，就算佢係咁向高層死𦧲，根本到依家公司都冇安排工作畀佢！」

未能回歸幕前，但自信心爆棚的她，亦懶理觀眾鬧爆，繼續有好心情，發誓歸發誓，姣婆極速故態復萌，返港個多月，已不停在個人社交網姣出po，不但著住睡衣短褲裝飾聖誕樹，又著bra top趴地，就連避走美國八個月的寫意生活，亦唔怕曝光人前，po出留美期間穿著緊身露腰衫遊玩的照片表現風騷，厚顏超越想像。

返港唔黐家換髮型轉運

姣心穎回港時表示為陪伴家人，其實佢一個累全家，家人被牽連受盡惡評都要繼續力撐她，先係最大折磨，除了冬至全家上門陪她團圓，今年黃心穎踏入31歲，一家人更連走兩場陪她慶生。據知情者透露：「唔似得上年有安仔同馬明輪住陪佢過生日，搞人老公被千夫所指，就算以前班好姊妹同圈中朋友，都怕被歸納為同類人一早疏遠佢，咪以為佢會好孤單，心穎根本唔當一回事，返嚟香港仲去set頭扮靚，又信相士講換髮型轉運，仲話 31歲生日要搞大佢，屋企人先陪佢出去打邊爐，又約咗大班朋友陪佢唱K玩通宵，但事前佢經理人同屋企人勸佢多啲留喺屋企唔好周圍去，但佢成日嗌悶，屋企人輪住陪佢都唔夠，好快佢已經唔黐家，原來佢喺美國嗰幾個月，識咗班ABC朋友，呢排就成日約埋一齊出嚟玩！」

主動抄牌攻仔 入侵富二代圈

當年扮粉絲成功追掂無綫筍盤馬國明，黃心穎依然唔心 足，拍拖期間已屢傳暗撻富二代，然後秘搞人夫安仔搞到人財兩失，同馬明分手收場，出走美國原來仲繼續風流快活，今次回港過農曆年，更火速重施故技借團拜向富二代埋身。

據知情者透露：「今個新年心穎好多節目，佢喺美國班ABC朋友返嚟香港過年，搞咗幾個團拜，搭上搭當中仲有唔少係富二代有錢仔出席，佢知道之後仆倒去玩，佢係機會主義者，只要係有家底唔理好醜，佢已經主動抄牌，近日就同幾個富二代玩得好埋！不知幾風騷，根本懶得理有冇機會再返出嚟做嘢！瘟仔大過天！」 姣花惹唔過，睇怕男人想黐埋去玩吓都真係諗清楚好！？