40歲林峯為妻違父令 與29歲夫人張馨月過二人世界唔趕生B

撰文、圖片：東方新地

林峯正式封盤！吳千語堅拒祝福舊愛

暖男筍盤林峯結婚了！有人快活有人愁，出名體貼，寵女友無微不至的林峯， 2019除夕宣布封盤，同拍拖未夠兩年的張馨月拉埋天窗，正式成為林太的張馨月，得林峯及夫家錫到燶，成為人妻勝利組，林峯公布喜訊更甜爆冧妻，高調晒愛的宣言：「往後的歲月有妳相伴，我的夫人張馨月！」令林太甜入心，夫妻幸福合拍，葡萄走寶的吳千語，日前出席活動堅拒祝福舊愛：「唔想評論！」全程表現冇量度，幸福人妻不是我，只能怪自己當初唔識珍惜！

林峯為妻違父令 先過二人世界唔生B

拍拖兩年， 能夠成功將「最佳男朋友」林峯私有化，林太張馨月超越超級港女吳千語絕對合情合理，早已做足一百分的峯嫂， 對林峯體貼照顧入微外，聽教聽話更深得林峯父母歡心，雖然 豪門婚宴稍後才舉行，但決定40歲生日做人夫的林峯，為冧妻反傳統低調先簽紙給張馨月「林太」名份，老爺奶奶飲過新抱茶， 亦叮囑一對新人盡快為林家開枝散葉，不過寵妻號林峯，想爭取時間過吓二人世界，激罕違父令暫緩生B，不過對兒媳錫到燶的林峯父母，亦開通體諒乖仔， 兒子全權話事！話晒29歲張馨月仲年輕，生多幾個都冇難度！

林峯夠浪漫 將林太張馨月寵上天

暖男林峯將老婆寵上天，婚前裝修薄扶林複式單位愛巢，亦交由張馨月全 權話事，早前張馨月悉心在家布置聖誕樹，還在社交網大晒林峯讓她布置影視 廳，張馨月精心設置了一個零食櫃，盡顯夫妻甜蜜生活一面，完婚後林峯又為老婆安排了日本飄雪蜜月之旅，不停為愛妻製造驚喜。

據知情者透露：「張馨月好善解人意，佢對婚禮嘅嘢冇大意見，完全交畀老公同夫家話事，阿峯係超級好男人，時刻想製造驚喜畀老婆，雖然低調註冊先，不過嚟緊婚宴都好大型，奶奶亦準備咗家傳之寶送畀新抱，註冊完之後，阿峯仲特登為老婆安排咗個北海道滑雪之旅，因為張馨月第一次滑雪，成個旅程都好多驚喜，有老公喺身邊細心教路，佢哋玩得好盡興！」祝林生林太繼續幸福落去！