【周遊關西】洋葱番外篇：壽司老闆故事被讚動人 周奕瑋感動發文答謝觀眾

撰文：關西旅行愛好者 ｜圖片：《周遊關西》截圖、周奕瑋Facebook

周奕瑋發文感謝觀眾

無綫旅遊節目《周遊關西》噚晚播出第7集，主持周奕瑋帶大家去到大阪市櫻川一家主要賣箱壽司嘅食店。食店創業至今已經114年，掌舵人一代接一代，而店舖位置亦曾經變動過，可謂一間有歷史亦有故事嘅店舖。

食店而家由第三代傳人，84歲小林利朗先生獨自打理，由烹調食物、門面清理到落單，都由小林先生一手包辦。喺閒談過程之中，周奕瑋問小林先生有無諗過想做壽司職人以外嘅職業，小林先生則表示細個想從事電影行業。

周奕瑋問得好 小林先生答得動人

小林先生又指，由於自己係長子，所以注定要繼承家業，因而放棄做電影工作嘅夢想。同時，小林先生為咗可以俾細佬妹做自己鍾意做嘅事，所以決定由佢自己守住百年老店。

一位84歲老人獨自打理食店就梗係辛苦，而小林先生堅持做落去嘅原因係源自客人鼓勵，所以小林先生認為有氣有力嘅時候，仍然要堅持落去。

小林先生堅持家業背後故事感動唔少觀眾，大部分觀眾亦去到周奕瑋嘅Facebook同Instagram留言，大讚「最正係呢集」，亦有人話小林先生嘅故事令人非常感動。

今日下午Jarvis將少量觀眾留言Post上Facebook，並寫道：

「這些文字、讓我知道自己沒做錯、沒走錯、只是做得還不夠多、不夠讓這能量在世界顯眼。」

「沒有人有必要為你花心思寫那麼多字，也沒有人有必要回應你傳開去的能量。」

最後亦加上Hashtag「朝早搞到我流眼淚你哋好毒」，可見網民留言觸動到Jarivs，不過最重點係，其實都係靠Jarvis同團隊努力先拍到令人感動嘅故事姐。