【復仇者聯盟4】劇透手法層出不窮 劇透狂用AirDrop瘋狂亂發劇情
廣告
【復仇者聯盟4】萬眾期待嘅《復仇者聯盟4︰終局之戰》日前上映，唔少未睇電影嘅人都好驚被人劇透，有好多人仲話要唔上任何社交媒體，直到睇咗套戲為止。但劇透L嘅手法真係層出不窮，一次比一次新奇！有網民日前喺Facebook發文，表示自己喺茶餐廳食飯時，有人無啦啦用AirDrop將成篇《復仇者聯盟4》劇情send咗畀佢！
撰文：PC | 圖片來源：Facebook截圖、網上圖片
【復仇者聯盟4】喺街都被劇透 手法新奇
該位被劇透嘅網民日前於Facebook群組「小心駕駛（討論別人駕駛態度）」中表示，自己早幾日喺茶餐廳食飯嘅時候，突然間收到一個陌生人用AirDrop將《復仇者聯盟4︰終局之戰》嘅劇情send畀佢！
【復仇者聯盟4】劇透狂手法層出不窮
劇透狂將自己嘅iPhone名稱改成劇情嘅重點，再劇情打低，然後cap圖，將圖片send出去。因為AirDrop有預覽功能，所以收到嘅時候就會即刻見到劇情重點！好在嗰位網民表示「好在一早已經睇咗」。如果未睇《復仇者聯盟4》，而又收到呢個信息嘅話，相信一定會崩潰！
【復仇者聯盟4】網民反應熱烈 教用方法KO
大量網民知道之後都好不滿劇透狂嘅方法，更話：「咁算唔算係恐怖襲擊呀？」、「已睇咗，不過唔欣賞呢種share方式」。有網民建議大家出街嘅時候好最熄咗AirDrop，或者將AirDrop設置為「只限通訊錄聯絡人」，咁就可以完全避免收到劇透信息喇～
