飲牛奶免肚瀉方法！日本醫生詳解：有補鈣＋增高＋解酒功效 ｜食是食非

關於飲牛奶的5大疑惑

飲牛奶迷思1. 飲牛奶會肚瀉？

的確，成日會聽到有人話飲牛奶會飲壞肚，一飲就瀉。醫生就話，一飲牛奶就瀉嘅人，係有「乳糖不耐症」，意即小腸內能分解乳糖嘅酵素含有量較少，而呢類人士唔係唔飲得牛奶，只係需要多少少步驟。

飲牛奶唔飲壞肚嘅方法有2種

分解乳糖嘅酵素成分較少嘅人，飲牛奶會容易肚瀉。飲牛奶唔飲壞肚嘅方法有2種，一係逐啖逐啖咁慢慢飲，一係將牛奶溫熱後再飲。

但將牛奶整熱，又會唔會令營養流失？醫生指出，維他命C一經加熱就會流失，但牛奶中所含嘅維他命C本來就唔多，其他營養成分亦唔會因加熱而流失，所以可以放心加熱飲用。另一方面，亦有料理係使用牛奶製作嘅，例如奶油燉菜咁，唔習慣飲牛奶嘅人，都可以透過食其他料理吸收牛奶嘅營養。

牛奶加熱後，表面嗰層「皮」又係啲咩嚟嘅呢？原來呢層「皮」，係蛋白質嚟嘅！唔知大家有冇好似嘉賓，大塚寧寧咁整走層「皮」先飲呢？如果之前係會整走嘅，記得以後唔好喇！醫生話飲埋佢，唔好浪費呢層營養。

飲牛奶迷思2. 飲牛奶會高？

童年時實有被長輩叫飲多啲牛奶，因為飲多啲有機會長高。醫生就話，呢個唔係謠傳，係實話嚟！牛奶含有豐富鈣質同蛋白質，可增進肌肉同骨骼發展。尤其睡前飲一杯，功效更為顯著。

睡眠時，生長荷爾蒙嘅活動最為活躍，能夠更好地提升鈣質同蛋白質嘅吸收率，令肌肉同骨骼變得壯大，令身體長高。

飲牛奶迷思3. 飲牛奶會肥？

醫生話，飲牛奶會致肥呢個傳聞，並唔係真嘅。一杯約200ml嘅牛奶，脂肪含有量為138kcal，而呢一個數值，喺成年人一日需要吸收嘅卡路里中，只佔約7%。因此，每日飲一杯牛奶，並唔會係致肥嘅主因。

而且，牛奶中含有稱為「乳鐵蛋白」嘅成分，能夠將牛奶中嘅脂肪減低，所以飲牛奶其實不易肥。

飲牛奶迷思4. 飲酒前，先飲牛奶能「千杯不醉」？

節目組進行街訪時，有受訪者表示聽聞過飲酒前，先飲牛奶可以「千杯不醉」，但醫生就話其實呢個說法，並沒有醫學根據。

雖然飲完牛奶之後，奶會喺胃內形成一層薄膜保護胃臟，但因為酒精嘅成分粒子幼細，仍是會被吸收嘅，所以飲完牛奶再飲酒，可以「千杯不醉」只係傳聞，而非事實。

之但係！醫生話酒精同牛奶一齊飲用嘅話，係會有一個神奇嘅作用！呢個作用就係解酒喇！

牛奶嘅蛋白質可以提升肝機能嘅運作，令肝臟加快進行新陳代謝，可以令酒後人士加快酒醒時間，防止宿醉。

飲牛奶迷思5. 咩時間飲牛奶最好？

眾所周知，牛奶含有豐富鈣質，唔單止可以促進肌肉同筋骨健康發展，更加可以保持腦部年輕健康，對預防老人癡呆甚有功效。

而醫生指，雖然唔少食材都含有鈣質，但重要嘅係鈣質嘅「吸收率」，吸收率不足嘅話，食咗都冇多大好處。

研究顯示，牛奶所含嘅鈣質吸收率，比小魚同蔬菜都仲要高！呢個作用，係源自只有奶類製品先有嘅「酪蛋白」成分，身體將呢樣成分消化後，會令鈣質成為溶解狀態，更易被身體吸收。

咁咩時間飲最能提升吸收率呢？

據醫生所講，餐前飲牛奶最能夠提升吸收率，當胃部處於空腹嘅酸性狀態，牛奶中嘅鈣質落到胃部後，就會變為鈣離子，身體更加容易吸收。而餐後飲都唔係話唔得嘅，只係餐前飲能吸收到嘅鈣質更為豐富。

增加肌肉嘅牛奶飲法

牛奶含有增強肌肉嘅9種胺基酸，能夠將蛋白質分解並形成肌肉，而呢9種胺基酸係只能從食物中吸收，人體自身係無法製造出的。

如果只靠飲牛奶攝取足夠嘅胺基酸，一日飲3杯就可。但唔係個個都咁鍾意飲嘅！醫生就話配合營養均衡，含有其他各種胺基酸嘅食物，一日飲一杯牛奶已經非常足夠。

牛奶最強飲法！

據醫生所講，蛋白質同糖質同時攝取，係最有利於增強肌肉嘅飲法，所以推薦香蕉＋牛奶咁飲。

因為做運動時，糖質會成為能量，身體會先消耗糖質，當糖質已經消耗完，就會開始消耗蛋白質，為咗防止蛋白質流失，就建議同糖質一同攝取，蛋白質＋糖質能加強兩倍肌力增強力。

唔鍾意食香蕉？咁就可以試下喺牛奶裡面加黃豆粉同蜂蜜，同樣有呢個作用之餘，嘉賓都大讚好好飲！黃豆粉有整腸作用之餘，仲有美肌功效。蜂蜜則可加強糖質。

牛奶可以消暑？！

中暑係因為水份同礦物質嘅流失，而牛奶亦含有豐富礦物成分，醫生於是認為比水更具消暑成分。

圖片及資料來源：《林修の今でしょ！講座》