【觀塘】大澳老字號出城 工廈賣花膠自家醬

大澳的生曬海味出名地道天然，充滿本土漁港特色，但走一轉去大澳都頗花時間。在島上祖傳三代的益昌號最近衝出大澳，帶齊特產在觀塘開分店，過千呎的陳列室擺滿各款海味，全由大澳自家曬場生產及加工。店內一邊牆身放滿金黃厚身的花膠，隻隻通透無雜質，各有身價，送禮自用都得。自家醬料也是招牌貨，除了馳名蝦糕，還有專為現代人而設的熟蝦醬、蜆肉醬和XO 醬，用上大澳周邊海域的海鮮調製而成，即開即食，煮餸、宵夜撈麵一樣滋味。地點夠晒就腳，以後唔使山長水遠入大澳喇！