大埔公屋商場改奇怪英文名被港人取笑「大吉利是」：好心用中文算啦

Jan 15 2024

現時香港不論樓盤或是商場名，都會改得越來越「特別」，有時令人都難以啟齒。而近日，大埔一公屋商場改名後惹港人熱議，因其中文新名名為「幸匯」，與「幸會」同音，聽似正常，但一翻譯成英文就被指「出晒事」，更被嘲笑指意頭不好，稱「唔識英文就用中文算啦」。

大埔公屋商場改新名　翻譯英文後即被嘲出事：做咩咒自己

相關的公屋商場其實正正是大埔運頭塘邨商場公屋，其改名一事在網上掀起熱議，Facebook群組「大埔TAI PO」亦有街坊留言討論。事關其商場最近改名為「幸匯」，與「幸會」一詞同音，帶有意境。但當翻譯成英文「Better Place」後，反而被網民嘲笑，並指「個商場一嚟就自己咒自己」，認為相當不吉利。

網民：「Better Place」係形容「極樂世界」喎！

「Better Place」，有人會解釋為「更好的地方」，但有網民留言反嘲「改名嗰件友肯定唔知呢個字既另一意思」，指「better place」的用法通常用於先人身上，當人過身後，在世的人會祝願逝者早登極樂世界，去到一個「better place」。因而當眼見商場改名後竟用上這字眼，感到相當出奇，指「邊個做改名，越改越古怪」、「幸會幸會 ……….. 打招呼呀 ?」、「阿茂整餅無嗰樣整嗰樣」、「中文名幸會，英文名應該係Nice To Meet You」、「不如改名叫『運吉』啦」、「同先人先會講嘅說話，真係大吉利是」、「改個咁嘅怪雞名，係咪咒啲客人」、「名符其實中譯英就算，果然係香港人」、「上天堂，入去就升仙」。而有網民指，如果用拼音來翻譯就會變成更差的意思，因「幸匯拼音=XingHui=行賄」。