港女帶GAS爐上酒店房打邊爐　曬命食和牛海鮮餐　網民鬧爆：真係好無品！

Nov 14 2023

不少人為慳錢，都會寧願自己買餸打邊爐，而不捱貴價出街食，但並非所有室內地方都可以開爐「滾兩滾」！近日就有港女疑在日本酒店房私自打邊爐後，自行影相放Instagram晒命，結果被眼利網民發現，旋即Cap圖瘋傳，並指「做得出咁缺德嘢嘅人，唔會係好人」。而事主更被踢爆真實身分，惹來更大嘲笑，指「做得呢行都預咗係無咩腦嘅人」、「呢行最鍾意Show Off，無聊當有趣，啱晒」。

港女酒店房用明火打邊爐　影相曬和牛曬出禍

Facebook群組「Made in Japan關注組」轉發了2張Instagram截圖而來的相片，相中打上了「去Conference嘅重頭戲，酒店和牛打邊爐」，而相中可以不但有「和牛、肉類、海鮮、菜」等材料外，最惹人矚目的是「邊爐」！事關她們在房內竟用明火爐煮食，相當大膽。有人更指「搵咁多錢要一班人喺酒店房打邊爐？成間房油煙人哋下個點住？而家5算都無錢出街食？又話年薪百萬？明火，燒著就大獲！個煙霧防火警鐘一被燭動你哋就知大獲」。

網民：真係影衰香港人！

不少人看到後轉發照片，並指「咁過份應該要Send畀酒店處理」，有網民則透露已一早行動，把證據交由酒店調查。而當得知是香港人所做的「蠢事」時，不少人都感到失望，指「真係好無公德心，咁大個人都唔知每間房有煙霧感應器？」、「影衰晒香港人呢3個字」、「同有幾多錢無關，但同品德、智商、常識有關」、「點解做衰嘢要擺上網呢？呢D叫唔知衰」、「明火真係過份，不知所謂」、「想打邊爐就住民宿啦，酒店打仲要明火，係咪有病啊」。

而有網民指，據該名港女的帖文可見，其任職保險行業，公司Logo是綠色的，認為是「宏X Agent」，希望該公司嚴肅處理。而有網民得知女事主從事的行業後，嘲諷得更厲害，指「唔怪得啦做保險，呢行最鍾意曬命，同得個吹字，無誠信可言」、「做得呢行都無品又無腦，唔怪之得會影相放上網」、「又話自己搵好多錢，出去旅行就無錢食飯啊？」、「保險X幾時都係咁，去旅行去到咁我真係頭一次見，無錢到咁仲去旅行」。