渣甸山再現入屋爆竊案　專登偷走呢2樣嘢被指「史上最出人意表」：唔簡單

Nov 8 2023

渣甸山為港島傳統富豪地段，近年來經常成為賊人入屋爆竊目標，而今日（8日）亦有一宗賊人入屋爆竊案發生，但其賊人偷取的目標竟然突破眾網民想像，掀起熱議。事關今次賊人偷走的，「唔係錶、唔係錢、唔係名牌」，而是2樣極度普通的物品。消息一出，網民即爆笑留言，指「內情一定唔簡單，係咪廣告宣傳嚟」；更有人指「咦，MIRROR套電影《12怪盗》就嚟上映，係咪宣傳啊」。

渣甸山獨立屋被爆竊　賊人偷走「2樣嘢」驚嚇網民

據消息指，警方今（8日）中午12時接到一名70歲女住戶報案，指其跑馬地渣甸山白建時道83號的獨立屋被可疑人士闖入。消息指，女住戶的外傭於凌晨4時左右，發現一名可疑男子身影突然出現屋內，當時女傭高聲呼叫，把賊人嚇走。而執法人員其後到場調查，指相信有人曾越過圍欄，繼而爬入獨立屋範圍，屋內一個窗框有損毀痕跡。而女住戶事後點算屋內財物，表示只不見了2罐汽水，懷疑是賊人偷走，警方亦把案件列作「爆竊」處理。

網民：案情唔簡單喎！

網民看到消息後，紛紛感到驚嚇，指「山長水遠入豪宅爆格，就係為咗2罐可樂？」、「唔通係傳說中嘅飲咗會發光可樂？喺有錢人屋企拎嘅特別有功效？」、「案情唔簡單，有錢佬竟然數住屋企有幾多罐可樂？可能佢偷走嘅汽水係82年，未開封，絕版」、「偷偷吓嘢口渴，開個雪櫃飲啫？」、「會唔會係個工人大嗌有賊嗰陣，口乾得濟自己飲咗2罐可樂」、「限量版、絕版、舊裝、未開氣可樂你地識條鐵咩」、「爆竊完乜嘢收穫都冇，兩罐可樂當安慰獎」、「渣甸山次次畀人偷嘢，一係就幾皮嘢唔見，一係首飾名牌，今次真係突破想像」。

不過也有網民懷疑可能是可樂公司賣廣告的手法，指「係咪賣緊廣告，而家D公關好鍾意用呢招，一個有錢婆點可能知自己屋企少咗2罐可樂咁特別」、「可口可樂自己都想不到這樣的新式廣告」、「可樂宣傳技倆的話，都幾Work」、「可樂新廣告，飲咗可樂，爆格都會浪子回頭」；亦有網民指「諗起MIRROR套《12怪盗》，會唔會關佢哋事」、「呢個賊就真係怪盗啦，建議MIRROR重演呢個情節，實笑死」。