港女嫌下雨天巴士埋站太前 遭淋濕即發爛渣鬧司機：垃圾

港女狂鬧巴士司機正垃圾 不滿埋站太前被雨淋濕

早前Instagram有一影片在網上備受熱議，事關有網民拍到一名乘搭71K巴士、身穿白色連身裙的女士，一上車即狂鬧司機「正垃圾」，認為司機埋站太前令她被雨淋濕。

港女開口便說：「你行出去啊，衝出去啊！你想死啊」，之後又大罵「做乜車長啊？唔好做啊，走啦，唔好做啊」、「你係咪仲喺度講啊，係咪你啊，有病睇醫生啦，唔想揸就走，你啲咁嘅垃圾」。

司機開車門叫白裙女落車 乘客：趕時間咪嘈啦

司機被白裙女追住鬧，於是按下開門掣，並問對方：「你係咪走啊？走囉，落車啊」，此時港女即指「我唔落啊，我做咩要落」，而司機則再重複稱「落車啊」。

由於2人嘈交，巴士停於路上，有乘客不耐煩地勸雙方「收聲」，更2度大叫「趕時間啊」，令司機左右做人難，此時港女再向司機稱「你撩我嗌交啊？」，惟有男乘客即叫白衣裙女「收聲」，指「阿姐妳咁樣騷擾住司機，開唔到車㗎」。

港女：唔想揸就走，你呢啲正垃圾

之後港女仍不收口，指司機唔開車是他問題，而司機則解釋「係你自己上嚟嘈㗎啊姐，我唔係同你嗌交，係解釋你聽」。然而港女繼續罵，指「開車啦仲話人，你係咪仲喺度講？有病就睇醫生，唔想揸就走啦，你啲咁嘅垃圾」、「我去到樓梯口仲畀你鬧返轉頭」。最終司機懶理，拋下一句「你都蠻不講理」，然後竟立即乖乖開車。

網民：好想兜巴星佢

有不少人看完影片後，大指司機好慘，認為港女潑婦罵街上身，稱「人工唔包受氣」、「港女真係極品西客，驚濕唔帶遮？」、「其實咁樣騷擾司機，真係可以拉得」、「聽到把聲想兜巴星」、「咁都仲開車，好癲，比我就停喺度鬥玩」。不過亦有網民指司機不應該與乘客嘈交，一點都不划算，直接報警好過」。