HKTVmall遭力數4宗罪稱越做越衰 送貨員扮客簽收未算最離譜：當客係狗咁玩
港人力數HKTVmall 4宗罪 稱「越做越衰」離晒譜
該名網民於討論區問大家有多少人遇到下列4個情況，指客服永遠得「BOT」對答，連電話都沒有，「慘過CUT有線」，更指百佳、惠康、iHerb都從未試過以下情況，只有HKTV可以做到咁「西」，「根本當客人係狗」，而他提及的4大情況如下：
1.送貨之前唔會打電話/WhatsApp通知
2.過咗送貨時間照樣衝上嚟叫你收貨
3.無通知＋直接擺貨喺你門口就走咗去
4.門口影張相就話你已經簽收咗，投訴都無用
網民：試過衰到代我簽名話收咗貨
言論惹來激烈討論，不少網民隨即留言指自己遇過以上情況，指「試過第3樣呀真係，一開門見到堆貨其實都幾O咀」、「送漏貨然後個送貨佬自己幫我簽收扮有送，簽名圖係咩都無，留言同HKTV講，佢覆我話系統顯示已簽收，我話張簽名圖乜X都無喎，然後兩日都無覆我，最後搞咗成個星期先退到錢，求其影張相就話簽收咗，班人其實明唔明咩叫『簽收』」、「明明揀咗夜晚送貨，佢下晝1、2點送嚟話無人收要返倉」、「試過收唔到貨佢突然轉已簽收，打去問佢話運輸問題聯絡唔到，隔咗一日先死死地氣話聽日送」、「送急凍嘢都係咁，自己早咗兩個鐘到，明知無人都夾硬放你門口勁X街，啲送貨佬以為自己大晒咁」；亦有人指單是送去智能櫃都出事，指「個櫃壞咗，送兩三日都話送唔到，想轉Location又話轉唔到，日日到時到候就Send Message話送到，但個櫃仲未整返好」。
有網民反斥：係客人自己西咋掛
反之，有網民指自己是長期顧客，認為根本係客人自己唔啱，自己光顧多年來都沒有以上問題，並且「買到變VIP」，指「最多而家送貨時段無以前咁多選擇，但一律未試過以上人士所講情況，上次打風都只係Delay咗一日，其餘都無問題非常滿意」、「個個都話返工屋企無人收貨，人哋唔放門口咁放邊，人哋洗唔洗凌晨先派比你？唔使收工咩？收得幾十蚊運費當自己大爺，如果有100個地址，100個都話6點送，人哋做條X咩」、「可能真係個別問題，而唔係成間公司D人都係咁，我個區送貨哥哥好好人，公司有突發嘢發生，無人收件住，佢特登畀我約去附近屋苑交收，辛苦晒佢哋」、「如果你唔該前、唔該後，對方根本唔會對你衰，係客人自己西咋掛，先會咁樣」。
