炎明熹自爆唔知新名含義 意外「講漏口」爆After Class未來去向

改名全因家人 不靠新名谷事業運

炎明熹早前將本名王佳恩改成「王爖熹」，當時有指新名會幫助她的事業運，其後她表示其實家人一早已經有幫自己改新名的打算，因為他們認為「佳恩」的名字太普遍兼容易被寫成「佳思」，再加上她覺得爸爸給出的名字自己都不太喜歡，因此才拖到自己18歲才去改。炎明熹更透露「爖熹」這個名字是父母請術數師改的，但自己也不太清楚新名的含意，認為改名只是心理作用，兼且「冇可能改個名就會如日中天」，凡事都需要靠自己努力。

笑稱自己都唔知買咗樓

炎明熹透露自己與姑丈姑媽搬到將軍澳已經一段時間，又澄清自己買樓一事，並笑稱：「我都想知自己買咗咩樓！」她又坦言現在還未是買樓的時候，但仍然希望將來能買到一個理想中的蝸居：「無論屋企係大定細，最緊要係入到門口可以放鬆晒一日嘅疲勞就可以。」

「Cut飛」事件告一段落

對於早前粉絲後援會表示遭公司cut演唱會飛一事，炎明熹表示十分無奈，亦透露公司已經解決事情，自己是最遲得到消息的。而據她了解，雙方已經和好如初，她也表示希望將來有能力再多開幾場，以回饋粉絲的支持。

After Class成員或有變動

炎明熹所屬的女子組合After Class最近傳聞不斷，除了姚焯菲（Chantel）現時正於國外就學，另一位成員鍾柔美（Yumi）近日又透露計劃海外升學，引起不少粉絲擔心After Class會否解散。雖然成員詹天文（Windy）曾大派定心丸表示沒有聽過解散的傳言，但是炎明熹早前的訪問卻「講漏口」，透露：「無論以後After Class仲係唔係我哋4個，定係其他人嘅After Class，相信都會得到大家嘅支持」，令不少網民猜測After Class接下來的動向。

「樂壇小天后」炎明熹（Gigi）早前宣布即將在10月初於九展舉行首個個人演唱會，門票公開發售當日反應熱烈，主辦方乘勝追擊宣布加場，可見炎明熹人氣的確夠曬強勁。不過所謂「人紅是非多」，最近在討論區中竟然有人發帖惡意中傷炎明熹演唱會！

炎明熹演唱會疑遭惡意中傷

近日有匿名網民於討論區留言「半價放炎明熹演唱會門票」，內容寫道：「d客送，炎明熹太樣衰，真係送飛都唔去」。不過最後開Po者被網友質疑憑空捏造，更呼籲對方拍低門票實物否則向admin舉報，結果該「新手用戶」被判斷為「違規用戶」遭admin刪帖了事，成功擊退惡意生謠的討論區打手。

網民反應兩極：己所不欲勿施於人

事件一傳出之後，引來不少網民在社交平台留言討論。雖然有網民留言力撐Gigi，認為討論區打手的行為非常無謂：「得閒冇嘢做玩中傷，冇事啊？」、「我想買靚飛都冇」、「攻擊人哋嗰樣做乜姐？」。不過亦有網民留言指認同「打手」的說法：「有朋友都問我要唔要飛，免費送，留返比啲腥港人，唔啱口味，太重廟街味」、「 應該好多人拎咗飛都唔去，最靚嘅畫面就會出現」、「己所不欲勿施於人，人地送俾你嘅野唔要仲好意思賣俾人？」等。

炎明熹紙牌慘遭神秘男子「強吻非禮」

除了有不良份子於討論區惡意中傷Gigi演唱會之外，有網民亦在討論區上傳多張某名神秘男子「強吻非禮」放在餐廳門外的Gigi紙牌。相中一名身穿白色T恤加灰色短褲的男子，對住Gigi紙牌由頭強吻到落腳，仲瀨埋紙牌上碟炒蛋，行為非常怪異。網民都紛紛留言怒斥該名男子的行為：「痴線佬 炎本人見到幅相都應該幾驚嚇」、「最後一張瀨緊邊」、「仲顛過馬車」等。

個唱門票開賣即售罄 一票難求歌迷買唔到飛

有「樂壇小天后」之稱的炎明熹（Gigi）奪得《聲夢傳奇》總冠軍後開始音樂路，早前宣布將於10月7日舉行首個個人演唱會，門票公開發售後不足兩小時就全部售罄。見銷情如此理想，主辦方隨即宣布加開10月8日場次！首個公售演出，就能夠得到廣大樂迷支持，當Gigi得悉這個喜訊後，難掩興奮心情，她說：「我前一晚仲緊張到瞓唔著，真係冇諗過反應咁好，開賣冇幾耐，我已經不斷收到歌迷喺社交網站私訊我話買唔到飛，好唔開心。」歌迷一票難求，黃牛黨更「趁火打劫」，聲稱手握前排靚位門票，要求私訊了解詳情及售價，非常猖狂。

Gigi親自向公司要求加場

出名痛錫歌迷的Gigi，第一時間向公司反映問題，擔心歌迷為了支持自己，不惜向黃牛黨買炒價飛。有見及此，主辦單位亦迅速採取應變措施，決定加開10月8日終極尾場，希望可以舒緩炒飛問題。Gigi亦馬上放下心頭大石：「之前睇啲前輩歌手開演唱會嘅報道，會煩惱歌迷買唔到飛，又會心痛佢哋幫襯黃牛黨，而家我終於身同感受，好多謝公司配合，好快就應承加多一場，但因為場地問題，唔可以再加。我想喺度呼籲我嘅歌迷，真係唔好幫襯黃牛黨，希望加場之後，大家都可以買到飛。」

為答謝歌迷付出雙倍心機

Gigi坦言，雖然決定加場後，令自己的壓力大增，但為了答謝歌迷，將會盡最大努力，好好完成2場演唱會：「正如我喺記者會上講，只要我攞起支咪，就會珍惜每一次演出，唱好每一首歌，為咗多謝歌迷嘅支持，我會雙倍俾心機。」

炎明熹 Gi-FORCE演唱會

日期：10月7日、8 日（星期六及日）

時間：晚上8時15分

地點：九龍灣國際展貿中心Star Hall

票價：$880、$680、$480

門票開售日期：8月25日上午10時

購票熱線：Ticket Purchase Hotline 31288288
網上購票：www.hkticketing.com

炎明熹感慨：呢段旅程非常之奇幻

在演唱會記者會上，Gigi分享由《聲夢》到現在的感受：

呢段旅程非常之奇幻，因為我本身都冇諗住成為一位歌手，但係好似喺呢一條路到慢慢有個力量想我將呢方面推廣去，因為我以前係同爸爸嘅一樣想做一位護士，但喺過程之中嘅中間我就好鍾意唱歌，同埋我發現咗呢一個興趣之後，佢問我想唔想唱歌，我就話我想，之後就開始咗比賽，再參加星夢，再慢慢成為歌手，我覺得自己非常之幸運，同埋多謝咁多位支持我。

見返影片嘅時候，我會叫自己保持初心，同埋會有一種想喊嘅感覺，但個種喊係可能睇返以前嘅自己唱歌同埋而家自己唱歌，拼埋嘅時候會變成新嘅感觸。

譚詠麟睇好炎明熹

另一方面，記者會上再播出前輩錄製的打氣片段，包括有譚校長譚詠麟、「奶爸」李克勤、楊千嬅及兩位老師李幸倪、泳兒。譚詠麟拍片打氣說︰「炎明熹係一位近年難得一見，全面同多元化嘅歌手，聽講佢10月開個唱，我對佢百分百有信心，會全力支持佢！」

大玩宇宙元素

炎明熹今次個唱名為「GI-FORCE」，她表示給予大家的印象似一個外星人，加上說話表達方式，令不少人覺得她來自「火星」。炎明熹笑指：「我講嘢好有邏輯，但我講同心入面唔同次序，所以大家有時聽唔明。」另外，她透露今次個唱大玩宇宙元素，宇宙有不同恆星，希望呈現不同感覺。

第一次真正舉啞鈴做gym

炎明熹稱為今次個唱首次去做Gym練體能，我第一次真正舉啞鈴，前幾日仲係酸痛緊，睡覺輾轉反側都會有啲痛。至於被問幾時在紅館開騷，炎明熹透露目標沒有設定幾多歲要去，希望一直努力，走到不同舞台，時機成熟就會去到。