堅尼地城50年老字號「新興食家」！街坊價點心：糯米卷／蟹膏燒賣／鴨腳札

堅尼地城「新興食家」半世紀老字號點心店！

香港地想食到點心不難，中午走進隨便一間酒樓都可以食到，但是想食到懷舊點心款式，卻是少之又少。如果想食到舊時的味道，可以走進堅尼地城這間屹立半世紀的點心店「新興食家」。小店開業50年，由凌晨3am開業至中午4pm，是街坊們飲夜茶、早茶的好地方。店子空間細小，走廊通道狹窄，只有數張大圓枱供食客共座一枱，因此搭枱都是預料之事。點心舖價錢相宜，最平$22/籠，盅飯都只需$30就食到，難怪連名星陳奕迅、謝霆鋒、食神蔡瀾等都經常到店捧場啦。

小店不時還有姐姐推車仔推銷點心，場面十足十回到舊香港酒樓一樣，好有懷舊味道。最近更加登上大陸社交平台「小紅書」的熱門推介，記者當日到店，全場幾乎8成都是大陸人，只有2成是街坊熟客。

最抵食$22/籠！失傳懷舊糯米包／雞球大包／蟹膏燒賣皇

新興食家的點心為自家製作，供應約56款點心，價錢由$22-$30不等。當中於餐牌不難看到店子保留了不少懷舊、幾乎絕跡的點心款式，包括羅漢齋粉包、懷舊糯米包、圍村臘腸卷、正雞球大包、鵪鶉蛋燒賣、豬潤燒賣、棉花雞等。點心雖然頗頗出爐，但是售罄的速度很快，記者中午時段柯打了6款點心，當中有3款經已賣完，所以想食到心水的款式都要早啲去啦。

推介$22一籠三件「懷舊糯米包」，以燒賣外皮包裹臘味糯米飯，臘味香氣突出，搭配軟糯香口的糯米飯，富有嚼勁。另外$28一籠三件的「蟹膏燒賣皇」亦很罕見，豬肉燒賣內加上橙黃蟹子粒，惟蟹膏味道不算突出，一試便可。

想食得飽肚可以柯打$30/盅的蒸飯，分別有6款：豉汁排骨飯、北菰滑雞飯、咸魚肉片飯、香茜牛肉飯、梅菜肉片飯以及圍村臘味飯。盅飯以傳統高身鐵盤盛裝，表面鋪滿配料，淋上甜豉油配白飯一併食，好滋味。

• 餐廳：新興食家
• 地址：西環堅尼地城士美非路8號地下C號舖
• 電話：2816 0616
• 營業時間：星期一至五3am-4pm