港媽3大1小去鮮芋仙共食1個甜品 不滿1歲B都要收低消$25惹熱議

港媽不滿1歲B都有低消$25 大言對鮮芋仙太失望

芋圓愛好者一定對台灣甜品品牌「鮮芋仙」耳熟能詳，該品牌以手工製作的芋圓、仙草、麻糬等台式甜品為主打，「鮮芋仙」幾乎成為芋圓的代名詞！不過，日前就有港媽在鮮芋仙遇到一個不愉快情況。港媽在Facebook群組「香港茶餐廳及美食關注組」發帖文分享，當日她們三位成人、一位1歲嬰兒到鮮芋仙吃甜品，結帳時才發現單據上被多收了最低消費抵銷$22。不解下，港媽向店員查詢為何有此收費，店員則表示「每位最低消費$25 ，BB仔都計」。

從港媽上載的單據圖片可見，他們只叫了一項甜品：布丁Q麻薯牛奶冰（$62），配料另加芋頭、抺茶、布丁（$16），一共$78。單據最後有「最低消費抵銷（$22）」，全單$100，即則好合乎4人的最低消費價格。

港媽圍爐失敗反被插 網民反應超兩極

鮮芋仙採取最低消費$25的政策令港媽不滿，帖文亦隨即在半天內引來逾二千回覆及讚好。網民就此事熱議，欲網上圍爐訴苦的港媽更反遭網民攻擊！

反對港媽派：西客！

不少網民發現事主3成人1嬰兒佔堂食座位卻只吃1個甜品，認為港媽「食咁少野霸張4人枱仲好意思理直氣壯」、「3大食一碗，你都好意思，好多地方都係至少一人叫一樣」、「人哋都有成本舖租，3大1B 叫得2樣真係太小，人地有人均消費唔出奇。如果覺得大份咪叫嘢飲。」至於嬰兒是否應該收取低消的問題，大多網民認為嬰兒即使未能食用餐品也會佔據座位空間，理應收費，「話囇個BB 都係人，無理由我地唔當佢係人咁睇？」、「去酒樓bb佔位都計茶錢」、「學你咁計我幫襯二百蚊咪可以坐八個人？人地唔使做生意？唔係有細路仔就大哂」。

反對事主的網民直接反斥港媽是西客，指「啲西客從來都係唔覺得自己西」、「應該要改寫(每位最少一份甜品/配料不當一份甜品) 咁先搞得掂你呢類西客」！

支持港媽派：正西店，1歲都收！

有反對聲音的同時亦有支持聲音，也有少數網民留言大撐港媽，認為「個人覺得BB又不佔座位，真係唔應該計最低消費」、「正西店，1歲喎都收」、「人地睇唔過睇先BB都收最低消費姐」。也有網友吃過類似甜品，指甜品份量多，其實是2-3人份量：「佢個甜品$80都幾大兜，可以計3個人」。

同時，亦有持平分折事件的網民表示「由於呢間店有寫明堂食既每人最低消費，所以我覺得收係道理唔收係人情，收亦無錯。問題係，佢出單時有無提一提客人，或乜都唔講就出張單收錢。如果無提一提客人(尤其係手抱bb case的話)，咁店方做法就唔多理想。」