港男任職圖書館管理員 被中同老公恥笑 1句霸氣反擊對方即搵窿捐！
中學同學食飯聚會 老公被恥笑職位低
男事主表示早前約了四個中學同學食飯聚一聚，其中一個女同學表示想帶老公出席飯聚，而揀餐廳和訂位都可交由她的丈夫負責，因為她老公「好識食，同埋識好多餐廳嗰啲咁樣，咁OK啦」。
女同學人夫吹噓受老闆賞識
飯局期間大家分享近期生活、工作和生意，女同學老公就表示老闆好賞識他，「啱啱升咗佢做經理，又話老闆叫佢幫手開拓海外嘅業務。咁我同我另一個女仔friend都冇乜嘢，咪聽吓佢吹噓。」
人夫恥笑事主做圖書館管理員
人夫其後問事主從事甚麼職業，事主表示自己返圖書館管理員，幫人借書、還書，「點知佢老公聽完我做圖書館之後，就上晒電，係咁講你做圖書館？圖書館唔係都係得啲師奶、呀伯、學生哥做㗎咩？份人工夠唔夠使㗎？你老婆咪要出嚟做嘢幫補家計？」人夫繼續炫耀自己，表示自己剛由助理經理升做經理，老闆更加了$4,000人工，現在月薪3萬元。
事主一句KO人夫
突然事主一句KO人夫，「我做圖書館有$31,750」，大家沉默十幾秒後，另一名舊同學不知是否想打破僵局，開口問事主「你層綠表居屋賣咗未呀？呢排好好價喎！你就好啦，公司有福利，八九年就有綠表買樓」。這一句令到氣氛再度尷尬，另一個同學丈夫就突然說有要事先走，兩夫婦亦急急腳離去，最後留下事主與另一名女同學食4人餐和紅酒，最後事主結帳$3,000。
網民：暗中秒殺呢位老公，大快人心
不少網民紛紛熱議，「可能我老人家，現在後生仔會攞人工出嚟講㗎咩？唔係隱隱晦晦咁樣描述嘅咩？」、「暗中秒殺呢位老公，大快人心」、「屋企樓下返工先筍，慳時間，仲可以返屋企食飯，又慳車錢，唔記得熄火都可以即刻返去」、「一定要佢哋夾返份，咁大口氣」、「其實圖書館館理員可以去到好專業，大學個啲已經係，分好多條team做唔同嘢，並非坊間一般理解嘅前線」、「大學Librarian 簡直係 research 入門人仕嘅救星。如果佢做嗰行係要多啲科研多啲知識嘅話，應該會知道有 degree 嘅 Librarian 可以值$70k / month ….」、「30k當大數目，個目光細過粒芝麻」、「一班朋友的老公當中，總有幾個以為自己好叻」、「無錢咗幾多代和笨了幾多代，先會以為三萬好勁同做圖書館好流」。
