何文田賽車場門票$38起！記者試玩 佔地5萬呎＋電動高卡車＋飄移車

何文田賽車場記者試玩
全港獨有室內電動高卡車場佔地5萬平方呎

何文田「18 Challenge 愛民18彎」為全港唯一一間室內電動高卡車場，佔地足足5萬平方呎！分別有2條跑道，共18個彎位，包括「飄移車」、「XL飄移車」及刺激感十足嘅「電動高卡車」選擇，大人細路都啱玩！

車場主打嘅「電動高卡車」全港獨有，唔好以為好似碰碰車咁零裝備就玩得，要先入房觀看教學影片，再由店員親自講解注意事項，帶埋頭盔先可以入場㗎！提提女士們著裙係禁止入場㗎，不過萬一真係忘記咗，都可以現場付費租借連身賽車服，記者著住整套裝備，未開始落場已經拓海上身！

因應疫情，重開後場內所有高卡車及飄移車及頭盔都進行咗深層清潔，每一節車都會以噴霧消毒車身，每位客人亦可配戴一次性即棄浴帽，咁就玩得安心又放心！

電動高卡車全港獨有 記者落場試玩

高卡車賽道有12個彎位，其中有3個髮夾彎，挑戰度較高！對車零知識嘅記者本身都怕電動高卡車會難以操作，但落場先發現比想像中容易控制，除咗頭一圈太激動下撞到圍欄外，其餘時間都駕駛得頗順暢。店員教路扭軚盤時儘量要用力扭到最盡，如果唔係就會轉唔切彎，但對於女仔嚟講，高卡車車軚手感較重，都有少許難度。

提提大家高卡車無得「倒頭行」，不過即使稍一不慎撞到圍欄，卡車會立即暫停操作，員工會過嚟幫大家調整位置，絕對唔洗擔心要自己嚟！加上控制室內會有駐場員工留意住大家嘅舉動，咁就玩得安心又放心啦！場內會有排行榜，紀錄每位車手嘅賽車圈速，聽店員講暫時最高紀錄者係34秒一圈！

大人細路齊飄移

另一條飄移車賽道大人小朋友都啱玩！飄移車身體績較細，而且無煞掣位，所以千祈唔好開行turbo去到盡。比起高卡車亦多咗倒頭功能，軚盤上有箭咀標誌，行駛時會根據箭咀指向，只要將箭咀扭至向後就可以倒後行。通常選擇飄移車嘅客人都係娛樂居多，而高卡車就較受想練習速度嘅車手歡迎。記者試玩後覺得飄移車比想像中刺激，轉彎時郁動旁邊嘅車棍會令飄移效果更強勁，但對新手嚟講，比較難同時兼顧駕駛及棍波，記者都係留返下次再挑戰！

餐廳＋電競＋籃球機

場內設有餐廳提供食物，揸車揸到攰都可以食返餐補充體力。如果高卡車同飄移車都仲未滿足到你嘅賽車心，不妨體驗埋場內嘅電競虛擬賽車，逼真度超高！玩得唔夠盡興，都仲有其他遊樂設施，例如籃球機及飛鏢機等，老少皆宜，一定唔會悶親！

• 「18 Challenge 愛民18彎」室內高卡車場
• 地址：何文田愛民廣場2樓S1號（顯示地圖）
• 前往方法：何文田站B2出口步行7分鐘即可到達
• 營業時間：星期一至日10am-11pm
• 電話：6467 9459／6467 9369／5168 1878
• 價錢表（以官方最新價錢為準）
  1）「小型賽車」
  星期一至五 $238／1節（8分鐘）
  星期六至日及公眾假期 $298／1節
  2）「飄移車」
  全時段 $100／1節（6分鐘）
  3）「飄移車兩節及兒童套餐」
  全時段 $259／1節（6分鐘/節、1 份兒童套餐和 1 份飲料）
  4）「電競」
  全時段 $38／1節（10分鐘）
• 注意事項：「小型賽車」身高要求150cm以上，「飄移車」身高要求120cm以上及體重63kg以下，「飄移車兩節及兒童套餐」身高要求120cm以上及體重65kg以下，
• Facebook專頁：18 Challenge Karting