33歲湯洛雯從唐姨陷阱搶灘救馬國明 馬母親自回應對未來新抱印象

原文刊於《東方新地》

馬國明、湯洛雯高調認愛 緣份早注定

愛情魔力果然能將人完全改造，以往經常被指「天然呆」的馬國明，戀上無綫上位小花湯洛雯，即時變「浪漫情人」，同黃心穎甩拖十四個月，日前驚爆馬國明上湯洛雯紅磡寓所共聚四小時，之後兩人一齊落樓去商場手機舖買嘢，沐浴愛河連打扮都襯到絕，更全程默契十足，被問戀情，馬明更Man爆護花表示等適當時候回應。不過轉個頭，兩人已於凌晨同步在社交網po出獨角獸挽住小馬的情侶公仔認愛放閃， Sweet爆表現獲全城祝福。

馬湯戀感情一日千里，可以話是對的時間遇上對的人，出身富裕家庭的湯洛雯，身邊不乏富二代追求，遇上敦厚踏實，又會痛錫女友兼照顧周到的馬明，自然特別有安全感！而同樣地，曾經戀港女黃心穎的馬國明，遇上甜美爽朗，最重要是會視自己如珠如寶的女友，難免特別著迷，呢碗清泉靚湯自然特別好味！其實兩人早於2016年已經合作電視劇《心理追兇》扮演情侶，更巧合是，馬明近日在《降魔的2.0》飾演的小馬，前世正是羅天宇飾演的「降魔人天宇」，亦即是靚湯的前度男友，而女方又在「安心事件」後取代黃心穎在《法證先鋒IV》的角色，淵源之深不禁令人相信二人緣份早注定！

二人熟絡全因黃心穎 靚湯清純撩法攻陷馬明

單身了一年的馬明，同靚湯其實已暗撻四個月。據知情者透露：「雖然佢哋一齊拍過劇，亦都咀晒，但嗰時佢哋各有所屬，完全唔過電，而佢兩個熟絡其實都係因為心穎， 靚湯同心穎都喺12年參選港姐，之後兩個就好friend，有時一齊聚會，馬明都會喺度！上年馬明被背叛傷心甩拖，靚湯都有以朋友式問候男方，呢份窩心關懷，令馬明好深印象，到近月佢兩個喺電視城一齊有劇開，成日都會碰到，開始多咗傾偈，馬明對靚湯印象好好，靚湯亦覺得搵啱真命天子，仲主動出擊晚晚撩馬明傾電話，兩個愈傾愈啱feel，好快就有過電感覺！」

愛火極速升溫，兩人拍拖不久已經互見家長，更認定對方是結婚對象，天然呆馬明，平日性格怕羞內斂，遇上真愛原來也可以變冧女高手，近日在電視城開工，兩人經常撇甩各自劇組同事，到canteen撐枱腳，正與馬明一起拍《 BB大晒》的吳岱融，就大爆早知情，更笑言多次目擊二人飯敍，不過通氣唔出聲，認真鬼馬！網零互動。」不過，當被問到覺得靚湯適唔適合契哥，就明顯有啲酸溜溜：「我有乜所謂！最緊要佢同佢阿媽鍾意！」

原來自馬明得視帝升呢，唐詩詠亦對人氣愈來愈旺的馬明另眼相看，經常主動埋身。據知情者透露：「以前詩詠根本對馬明睇唔上眼，一路只當佢係兵，有乜需要就搵契哥幫手，馬明好錫契妹，亦好樂意幫忙，不過近呢半年，馬明人氣愈嚟愈旺，詩詠亦吼實呢個筍盤，一班『鐵馬兄弟』都好想撮合佢哋，成日會約埋聚會，年初詩詠同陳思銘冷戰，女方仲成日約馬明傾心事。一班兄弟一路以為佢哋有機會發展，所以突然爆出馬明戀靚湯，大家都好突然！以為自己食硬契哥嘅詩詠，當然唔敢相信啦！」今年二月本刊便曾拍到唐詩詠頻密約馬明，連買貓抓板都搵契哥陪，又借馬明Benz座駕代步。

大讚馬明五大優點

呢邊蘇州過後無艇搭，另一邊贏家靚湯便春風滿面，公開大數男友有五大優點，指他冷靜、善良、孝順、成熟、穩重，完全是無懈可擊類型，靚湯還表明心跡，認定馬明是一生一世對象，入行七年多，前所未有如此高調宣示主權的她，此舉正是為男友隔絕飛來蜢埋身。靚湯父母亦對兩人戀情開綠燈，靚湯爸湯鎮宗日前出席活動，便表示對未來女婿相當滿意，大讚他斯文有禮，為人踏實，並為他們送上祝福，而靚湯媽更給馬明100分，更揚言好放心將個女交託給他。而出名孝順的馬明，受訪時直認媽咪好鍾意靚湯，又大讚女友簡單貼地：「熟佢嘅人，都知佢食碗魚蛋粉都好開心！佢要求好簡單，呢方面同我好似！」夾到咁，又得雙方家長開綠燈，自認唔細的馬明閃娶唔係冇可能！

馬母笑談未來新抱：鍾意佢夠爽直！

記：本刊記者
馬：馬母

記：馬明公布戀情，開唔開心啊？鍾唔鍾意？
馬：開心！鍾意！
記：對湯洛雯印象點呀？
馬：幾靚女，個人幾爽！
記：馬明有冇帶佢返嚟見你？
馬：有，佢個人幾爽！啱啱佢嚟到，我喺廚房，佢仲走嚟，問Auntie，有冇嘢要幫手呀！
記：馬明早兩日都上女友屋企見家長呢？
馬：唔知呀！佢冇講畀我聽！
記：想唔想佢快啲結婚？
馬：佢咁大個仔，佢話事！
記：有冇睇過湯洛雯做戲呀？
馬：有，好似係頂咗唔知邊個嘅角色！
記：有算命師傅批馬明出年會結婚，你心唔心急？
馬：佢結婚咪結婚囉！佢都咁大個仔，自己話事啦！
記：想唔想快啲抱孫？

馬：呢啲日後先講啦！