25歲楊天宇孝順又有腦 為入行從190磅肥仔變爆肌鮮肉男神

撰文、圖片：東方新地

楊天宇成影壇搶手貨

2018年熱播網劇《 PTU機動部隊》，除了主角蔡卓妍、林峯型爆吸睛之 外，劇中PTU隊員楊天宇同樣醒神出位，演出獲網民大讚，擁有六呎身 高、40吋巨胸煞食外形，楊天宇甫出道便成為電影搶手貨，已先後拍過三 部電影《神探大戰》、《速戰》及《怒火》，去年又有份參與內地真人騷《演員的品格》演出，當中電影《怒火》更拍巨星甄子丹及謝霆鋒，贏在起跑線。

被霆鋒迷倒自稱觀察形學前輩做戲

能夠同兩位電影猛人拍戲偷師，楊天宇對兩大巨星讚不絕口：「講起霆 鋒，我真係迷咗，佢太有型，我好少日數同佢一齊拍，但佢一出場，已經好吸引，其中一場戲佢喺走廊行出嚟，已經好有型，始終佢拍動作戲好有經 驗，佢啲反應好快，喺戲入面好投入，太有型嘞好犀利！至於丹爺真係好打得，佢喺片場係一絲不苟，每樣嘢都要完美！」楊天宇坦言自己是觀察型，在片場會觀察霆鋒同丹爺演出，從兩人身上學到最珍貴一課：「我好少問，我係觀察型，每次等埋位，我都會睇佢哋點樣做，佢哋每個take都唔一樣，每次 都學到唔同嘅嘢！」

為入行從190磅肥仔變爆肌鮮肉男神

機會是留給有準備的人，單睇楊天宇高大俊朗外形，大家理所當然以為 爆肌男神上位手到拿來，但原來成功背後，他下了不少苦工， Angus（楊天宇） 接受本刊訪問時，就大爆為入行進行地獄式減肥狂操，一身肌肉得來不 易。他說：「呢身肌肉其實係我人生大轉變，喺美國讀書嘅時候我係肥仔 嚟，嗰時差唔多190磅，為咗入行簽公司，自己先決心減肥，花咗兩個幾月時間，冇trainer，只係自己上網睇資料，靠自己狂操，食嘢都要控制，要戒澱粉質、 戒糖戒鹽，食嘢要少油，每朝起身就係做gym，睇番嗰時成績自己都好滿意，直頭可 以打MMA輕量級！」

高學歷型男網民勁Like

努力有回報，楊天宇總算不負眾望，現時體重保持在150多磅， keep住運動量保持身形，已經不用再節食減肥。「依家就算食肥膩嘢同甜品都冇問題，除非要拍戲除衫先要on diet！」除咗睇得演得，楊天宇仲係有腦之人，中學畢業於喇沙書院，在美國西雅圖華盛頓大學經濟系畢業，讀書叻更是運動健將，曾是學校的排球、欖球及手球隊隊員，高學歷型男網民勁Like火速突圍，肺炎疫情亦無阻工作量。Angus外形討好，暖男形象更獲廣告客垂青，最近又接多兩部電影及拍ViuTV劇同在新城開咪做主持，工作排到年中，氣勢如虹，同英皇未約滿，公司已經加簽續約。對於「疫」市爆Job及未約滿已獲加簽，楊天宇感激公司畀機會：「我好鍾意公司，好慶幸公司肯同我續約，係一個肯定，肯定佢哋鍾意我先，亦表示公司 feel到我鍾意佢，要雙方面加埋先有呢個行動。」 條件好又努力，潛力股楊天宇前途無可限量！