【重拾放假節奏】自製城市小出走Staycation 打卡 + 美食 + 靚景（附入住優惠）

Oct 21 2020

打工仔返工望放假去旅行，可以放鬆下；即使留港，一樣可以嚟返個「小出走」，放假都要有放假嘅節奏，Staycation放鬆下，趁機會Get Back to Chill，排走平日忙碌嘅悶悶不樂！一齊睇睇我哋以下精選咗邊啲靚靚酒店，同埋有咩吸引之處！

1 鬧市中小寧靜大歎米芝蓮粵菜

相信大家對香港康得思酒店都唔會好陌生，位於旺角中心地帶，直接往來朗豪坊及港鐵旺角站，附近就係人流超多嘅瓊華中心同花園街，難得喺呢個人口密度冠絕全球嘅地區都可以享受到寧靜嘅假期，真係好特別嘅體驗。再試埋米芝蓮星級粵菜食府「明閣」，好似蜜汁叉燒、酥炸釀鮮蟹蓋等，都係必試之選，記得唔好錯過。自助餐廳「The Place」嘅特色自助餐「味遊海陸世界」都享負盛名，超多優質海鮮真係食極都唔厭，包括新鮮生蠔、藍青口、凍蝦及小龍蝦，熱盤有紐西蘭肉眼扒、威士忌烤豬肋骨等，真心正！

2 靚到喊豪華山景客房望住太平山

講到靚景，當然唔少得香港四季酒店，入住豪華山景客房，可以欣賞宏偉嘅太平山同繁華嘅香港市景，客房裝修豪華，景觀超開揚，雲石浴室感覺華麗！記得仲要試埋飽覽維港景色嘅米芝蓮三星餐廳「龍景軒」同「Caprice」，實行Stay and Dine！而入選為亞洲50佳酒吧嘅「Caprice Bar」係一間充滿古典風格嘅時尚酒吧，提供法國空運到港嘅芝士同多款特別嘅雞尾酒，而家憑合資格美國運通卡預訂入住仲可免費獲贈酒吧招牌Negroni雞尾酒兩瓶！

3 黃金海岸親子遊激大露台超relax

想一家大細去玩，唔少家長都會揀香港黃金海岸酒店，鍾意佢坐擁大自然景致又近沙灘，夠大地方俾小朋友跑動。入住豪華海景客房連露台，小朋友可以有多啲空間伸展，大人又可以坐喺露台飲下啤酒，睇下星星。酒店內有多間高質餐廳，包括米芝蓮推介中菜廳「粵」，必試得獎菜式「鴛鴦銀絲回味蟹」同埋「鳳躍天仙(乾坤無花果鹹檸雞煲)」！喜愛南洋風味嘅你，就要去試下正宗新加坡菜「沙嗲軒」，餐廳更設有露天座位，可以喺天然微風下品嚐海南雞飯、福建蝦湯麵及星洲炒蘿蔔糕等招牌菜色。

4 瞓醒望住維港食個靚靚早餐

位於太古廣場嘅香港港麗酒店臨近維港，豪華海景客房有個特大玻璃窗，夜晚睇到燈光璀璨嘅海港夜景，靜靜哋拎住杯香檳望住呢個夜景，咩都唔使諗，真係好放鬆；第二朝起身食早餐，選擇都好多，歐陸早餐、港式滋味、美式早餐或日式和食都有得揀，一邊欣賞住呢個無敵海景，一邊歎早餐，仲可以影張相打埋卡，chill到一個點！仲可以試埋以新派廣東菜聞名嘅「金葉庭」，嚟到食蟹嘅季節當然要歎返個薑茸米酒蒸蟹拑、蟹皇鮮蟹肶乾撈官燕。想high tea就可以去「樂聚廊」，特色三層架茶點加送限量港麗小熊玩偶，真係睇得玩得仲食得！

5 五星奢華體驗米芝蓮法國菜

唔一定要去外地先可以暢快咁消費，喺香港一樣可以豪得起！入住五星級嘅香港瑞吉酒店，Grand Deluxe Room配備勁chill嘅雲石style靚浴室，加埋純白高雅大浴缸，打卡一流；仲可以試埋管家服務，全程提供個人化嘅服務體驗，由你一行入酒店起，管家已經企喺大堂迎接你，專業熨燙、整理行李、上餐奉茶，以至推薦旅遊景點、代找裁縫訂製衣裳都一一幫到你，真係超貼身又貼心嘅服務！試埋首開業即獲米芝蓮一星嘅法國菜餐廳「L’Envol」同中菜廳「潤」，享受非一般嘅米芝蓮美食體驗！

6 感受南區悠閒一望無際驚喜海景

南區一向畀人悠閒嘅感覺，好似數碼港艾美酒店咁，客房對住一望無際嘅超級海景，真係望極都望唔厭，而且客房設計均揉合高科技設施及時尚設計，優雅獨特，充滿現代感。酒店內嘅日本餐廳「Umami」提供高質嘅日本料理，刺身、海膽、安格斯牛等都應有盡有。如果係一家人去，要照顧晒大家嘅飲食習慣，就可以去4樓嘅「Prompt Bistro」，餐廳提供多國菜式，由油甘魚刺身以至美國極黑和牛西冷、澳洲M6但馬和牛肉眼都一叫就有，超多選擇！

7 超大泳池 + 食食食

放假當然係要不停食食食啦！香港君悅酒店嘅自助晚餐就係最佳示範，「茶園Tiffin」嘅高水準自助晚餐主打歐陸菜式，生蠔、龍蝦、翡翠螺、青口等基本海鮮當然唔少得，仲有招牌菜威靈頓牛排都令人食指大動，餐廳內環境寬敞，可以舒舒服服咁享受豐富嘅一餐，真係大飽口福！

8 海旁散步嘅輕鬆假期空中餐廳享受寧靜

香港維港凱悅尚萃酒店嘅客房平均都好寛敞，所有客房都有海景。尊貴海景客房嘅浴室仲有全海景，可以對住個維港浸浴真係好爽！The Farmhouse咖啡廳提倡「由農場到餐桌」嘅國際自助餐理念，大部份菜式同海鮮都係有機種植或符合可持續發展嘅原則。仲有「Cruise空中餐廳及酒吧」，位於酒店頂層，設有綠洲露天陽台。喺高空望住個靚景飲酒，真係最佳嘅假期享受。